काठमाडौँ । त्रिवि क्रिकेट मैदान कीर्तिपुरमा नेपाल र जिम्बावेबीचको एकदिवसीय शृङ्खलाको अन्तिम प्रतियोगितामा नेपालले जितका लागि २१४ रनको लक्ष्य पाएको छ ।
चिसो मैदानका कारण खेल अवधि घटाएर ३३ ओभरमा झारिएको खेलमा टस हारेर सुरुआती ब्याटिङका लागि उत्रिएको जिम्बावे ए ले ३२.१ ओभरमा सबै विकेट गुमाई २१३ रन बनायो ।
उसका लागि टाडिवानासे मरुमानीले सर्वाधिक ५० रन बनाए । ३१ बल खेलेका उनको ब्याटबाट दुई छक्का र सात चौका बनेको थियो । त्यस्तै कुत्जाई मुन्द्जेले ३९ र रोय काइयाले ३६ रन जोडे ।
नेपालका लागि किशोर महतोले सर्वाधिक ५ विकेट लिए । त्यस्तै सोमपाल काकीले २ विकेट लिए भने करण केसी र दीपेन्द्रसिंह ऐरीले समान १/१ विकेट लिए । नेपालका लागि कप्तान सन्दीप लामिछाने सर्वाधिक महँगो सावित भए । उनले ६ ओभरमा बिनाविकेट ५६ रन दिए ।
नेपालले शृङ्खलाको पहिलो खेलमा ३ विकेटले हार बेहोरेको थियो भने दोस्रो खेलमा जिम्बावे ए लाई ९ विकेटले पराजित गरेको थियो ।
