काठमाडौँ । यही वैशाख ३० गते स्थानीय तह निर्वाचनको मतदानका दिन कोरोना विरुद्धको खोप अभियान सञ्चालन नहुने भएको छ ।
स्वास्थ्य तथा जनसंख्या मन्त्रालयले आइतबार एक विज्ञप्ति जारी गर्दै निर्वाचन सम्पन्न गर्न मतदान स्थलहरुमा स्वास्थ्यकर्मीसमेत परिचालन हुने र स्थानीय स्वास्थ्यकर्मीहरुले पनि आफ्नो मताधिकार प्रयोग गर्नुपर्ने हुनाले निर्वाचनका दिन अतिरिक्त खोप केन्द्र तथा नियमित खोप अभियान सञ्चालन नहुने जानकारी गराएको छ ।
मन्त्रालयले निर्वाचनअघि र पछिका दिनहरुमा खोप केन्द्रहरुमा नियमित खोप अभियान सञ्चालन हुने भएकाले सकेसम्म चाँडा कोभिड–१९ विरुद्ध खोप लगाई आफू र आफन्तलाई सुरक्षित राख्न सबैमा अनुरोध गरेको छ ।
साथै छिमेकी मुलुकहरुमा पछिल्ला दिनमा सक्रमण बढ्दै जाँदा नेपालमा जोखिम बढ्ने सम्भावना भएकाले सतर्क रहँदै जनस्वास्थ्यका मापदण्डहरुको ख्याल गरिदिन मन्त्रालयले अनुरोध गरेको छ ।
