काठमाडौं । हिजो प्रहरी महानिरीक्षकमा बढुवा भएका धिरजप्रताप सिंहलाई सरकारले आजै दर्ज्यानी चिह्न लगाइदिने भएको छ । गृह मन्त्रालयले बिहान ८ बजेर ४५ मिनेटमा दर्ज्यानी चिह्न लगाउने कार्यक्रम राखेको छ । त्यसैको तयारीमा नेपाल प्रहरी पनि रहेको छ ।
महानिरीक्षक सिंहको बढुवामा असन्तुष्ट अर्का एआईजी विश्वराज पोखरेल र सहकुल थापा सरकारको निर्णयका विरुद्धमा आज सर्वोच्च अदालत जाने तयारी गरिरहेका छन् । यसैकारणले सरकारले पनि अदालतमा रिट दायर नगर्दै अर्थात् अदालतको आदेश नआउँदै दर्ज्यानी चिह्नको तयारी गरेको हो ।
आज रिट परेपछि पेशी तोकिए सर्वोच्चले चिह्न लगाउनै रोक्न सक्ने अनुमान गरिएको छ । सरकारले तेस्रो वरियाताका सिंहलाई महानिरीक्षकमा बढुवा गरेपछि अदालतको आदेश आउन सक्ने अनुमान पनि गरिएको छ ।
रोलक्रममा तेस्रो नम्बरमा रहेका र पहिलो नम्बरका एआईजी विश्वराज पोखरेलभन्दा १६ महिनापछि एआईजी बनेका सिंहलाई महानिरीक्षकमा नियुक्त गरेको भन्दै सरकारको आलोचना भइरहेको छ । पोखरेल र थापाले वरिष्ठता र कार्यसम्पादनका आधारमा आफू महानिरीक्षक हुनुपर्ने माग गर्दै अदालत जाने तयारी गरेका हुन् ।
