काठमाडौँ । नेपाल प्रहरीका महानिरीक्षक (आईजीपी) शैलेश थापा क्षत्रीसहित १९ जना उच्च प्रहरी अधिकारीले अवकास पाएका छन् । तीस वर्षे सेवाहदका कारण उनीहरुले आइतबारदेखि लागु हुने गरी अनिवार्य अवकास पाएका हुन् ।
विसं २०४९ वैशाख १९ गतेदेखि प्रहरी सेवा गरेका आईजीपी क्षेत्रीसहित १९ उच्च प्रहरी अधिकारीको ३० वर्षे सेवाअवधि आइतबारदेखि समाप्त भएको छ ।
आईजीपी क्षेत्रीसहित अवकास पाउने चार अतिरिक्त महानिरीक्षक (एआईजीपी) मा हरिबहादुर पाल, नीरजबहादुर शाही, प्रद्युम्नकुमार कार्की र वसन्तकुमार पन्त छन् । त्यस्तै ११ नायव महानिरीक्षक (डिआईजीपी) मा घनश्याम अर्याल, ईश्वरबाबु कार्की, प्रकाशजंग कार्की, शौरभ राणा, राजेन्द्रप्रसाद चौधरी, गणेशबहादुर ऐर, पुरुषोत्तम कँडेल, डा. देवबहादुर बोहरा, रामकृपाल साह, उमेश रञ्जितकार र प्रकाश अधिकारीले पनि आइतबारदेखि लागु हुने गरी अनिवार्य अवकास पाएका छन् ।
