काठमाडौंः राष्ट्रिय खेलकुद परिषद् (राखेप) अन्तर्गतको राष्ट्रिय खेलाडी कल्याणकारी कोषले स्वास्थ्य उपचार गराइ रहेका विभिन्न ५ खेलका ६ जना खेलाडीलाई मंगलबार आर्थिक सहयोग प्रदान गरेको छ । परिषदले ६ खेलाडीलाई ५ लाख ५६ हजार ८ सय ४३ रुपैयाँ हस्तान्तरण गरेको जनाएको छ ।
नेपाललाई पहिलो अन्तर्राष्ट्रिय पदक दिलाएका एथलेटिक्सका जितबहादुर केसी र कराँतेका विष्णु नेपालीलाई समान १ लाख २५ हजार रुपैयाँ प्रदान गरिएको छ भने भलिबलकी रिया कुँवरलाई ६३ हजार ९२९, आईटीएफ तेक्वान्दोका दीपक गौतमलाई रु ८७ हजार ९१४, कराँतेकी कोपिला विष्टलाई रु ७५ हजार र ब्याडमिन्टनकी सीमा राजवंशीलाई रु. ८० हजार प्रदान गरिएको छ ।
केसीलाई हातमा चोट लागेको छ भने विष्णुलाई पक्षघात, रिया, सीमा र कोपिलालाई गोडामा चोट तथा दीपकलाई काँघको समस्या रहेको परिषदले जनाएको छ ।
कोषका अध्यक्ष समेत रहेका राखेपका सदस्य–सचिव टंकलाल घिसिङले खेलाडीलाई उक्त रकम बराबरको चेक एक कार्यक्रमबीच हस्तान्तरण गर्नु भएको छ । कोषका सदस्य–सचिव समेत रहेका नेपाल राष्ट्रिय तथा अन्तर्राष्ट्रिय खेलाडी संघका अध्यक्ष दीपक श्रेष्ठलगायतका पदाधिकारीको उपस्थितिमा सहयोग वितरण गरिएको हो ।
सदस्य–सचिव घिसिङले सानो सहयोगले पनि ठूलो अर्थ राख्ने बताउँदै कोषको आयतन बढाउनु पर्नेमा जोड दिनुभयो ।
