काठमाडौं । गठबन्धनमा संलग्न दलहरुले स्थानीय तह निर्वाचन अन्तर्गत महानगर र उपमहानगरपालिकामा भागबण्डा लगभग टुंग्याएका छन् । अब नेपालगञ्ज र जनकपुर उपमहानगरपालिकामा टुंग्याउन बाँकी रहेको र त्यो पनि आज टुंगो लाग्ने बताइएको छ ।
महानगरमा भने कांग्रेसले ५० प्रतिशत आफूले लिएर बाँकी ५० प्रतिशत गठबन्धनका अरु दललाई दिएको छ । जस अनुसार काठमाडौँ, ललितपुर र विराटनगर महानगरपालिकाको प्रमुखमा कांग्रेस र अरु तीनमा तीन दल छन् । चितवनमा माओवादी, पोखरामा नेकपा एस र उता विरगन्जमा जसपालाई दिने सहमति भएको छ ।
तर यस विभाजनले कांग्रेसभित्र भने व्यापक मात्रामा असन्तुष्टि सुरु भएको छ । खासगरी चितवन र पोखराका कारणले विवाद उत्पन्न भएको बताइएको छ । पोखरा र चितवनमा कांग्रेसले नै लिनुपर्ने दाबी त्यहाँका स्थानीय कांग्रेसी नेता कार्यकर्ताको रही आएको छ ।
चितवनका कांग्रेसले आफूहरुले हरेक चुनावमा माओवादीलाई भोट दिनुपर्ने बाध्यता रहेकाले अब त्यसो नगर्ने बताएका छन् भने उता पोखरामा नेकपा एसको कुनै पनि प्रभाव नरहेकाले उसलाई भोट नहाल्ने बताएका छन् ।
चितवन र पोखराका नेताहरुलाई पार्टी सभापति शेरबहादुर देउवाले काठमाडौंमै बोलाएर सहयोग गर्न भनेका भए पनि अहिलेसम्म उनीहरुले पार्टी निर्णयको पक्षमा अभिव्यक्ति दिएका छैनन् । जसका कारण यी चुनावको परिणाम आफ्नो पक्षमा नआउने हो कि भन्ने आशंका माओवादीमा परेको छ ।
यो असन्तुष्टि देउवा र कोइराला पक्षमा नै बाँडिएको देखिएको छ । कोइराला समूहले देउवाको यो निर्णयको विरोध गरिरहेको छ भने देउवाले भने गठबन्धन संस्कृति भनेको आफू एक्लैले लिनलाई नभएको सार्वजनिक अभिव्यक्ति नै हिजो दिएका छन् । यसले पनि कांग्रेसभित्र थप विवाद उत्पन्न गरेको बताइएको छ ।
