काठमाडौं । चौंथो संस्करणको एभरेष्ट प्रिमियर लिग (ईपीएल) टी–ट्वान्टी क्रिकेटमा साविक विजेता ललितपुर प्याट्रीयट्सले पहिलो जित निकालेको छ ।
कीर्तिपुरको टियु क्रिकेट मैदानमा भएको खेलमा ललितपुरले विराटनगर वारियर्सलाई ३७ रनले पराजित गर्दै पहिलो जित निकालेको हो ।
ललितपुरले दिएको २ सय २७ रनको लक्ष्य पछ्याउँदै ब्याटिङ गरेको विराटनगरले २० ओभरमा ८ विकेट गुमाएर १ सय ८९ रन मात्र बनायो । विराटनगरका लागि दिल्शन मुनाविराले ५९ रनको अर्धशतकीय इनिङ्स खेले ।
आसिफ शेखले ३७ रन जोडे भने चन्द्रपउल हेमराजले २८ रन बनाउँदा सिकन्दर राजा २४ रनमा आउट भए । ललितपुरका अज्मतुल्लाह ओमारजाईले ४ विकेट लिए । ललित राजवंशीले २ तथा योगेन्द्र सिंह कार्कीले १ विकेट लिए ।
यसअघि ललितपुरले ५ विकेट गुमाएर निर्धारित २० ओभरमा २ सय २६ रनको विशाल योगफल तयार पारेको थियो । ललितपुरले तयार पारेको यो योगफल ईपीएल इतिहासकै सर्वाधिक ठूलो योगफल रहेको छ ।
ललितपुरका लागि ओपनर विराकोड्डीले सर्वाधिक ७३ रन जोडे । उनले ३ छक्का र १० वटा चौका प्रहार गरेका थिए । यस्तै ओमारजाईले अविजित ५८ रन जोड्दै ७ छक्का प्रहार गरे ।
विराटनगरका कप्तान करण केसीले दुई विकेट लिए । सिकन्दर राजा, प्रतिश जिसी र दिलशान मुनाविराको नाममा समान एक–एक विकेट रह्यो ।
यस जितसँगै ललितपुरले ४ खेलमा ३ अंक जोडेको छ । विराटनगरको भने यो लगातार तेस्रो हार रहेको छ ।
