काठमाडौँ । नेपाली कांग्रेसका वरिष्ठ नेता रामचन्द्र पौडेलले कास्की कांग्रेसका नेताहरुलाई पोखरा महानगरपालिका नछोड्न भनेकाभ छन् । नेता पौडेलले कास्कीका नेताहरूलाई फोन गरेर सोमबार नै अडान नछाड्न भनेका थिए । पौडेलको फोनपछि कास्कीका नेताहरुले पोखरा महानगरको अडान नछोड्ने बताएका छन् ।
सत्ता गठबन्धन दलहरुको हिजोको बैठकमा नेपाली कांग्रेस र नेकपा एसले पोखरा महानगरमा दाबी गरेपछि विवाद उत्पन्न भएको छ । आजको फोनमा पौडेलले केन्द्रमा पनि पोखराको विषयले अड्किएको र आज त्यस विषयमा छलफल हुने जनाएका थिए । त्यसैले अडान नछोड्न उनले भनेको कास्कीका एक नेताले जानकारी दिए ।
उता कांग्रेस कास्कीका नेताहरुलाई पार्टी सभापति शेरबहादुर देउवाले काठमाडौं बोलाएका छन् । आज बिहान देउवाले फोन गरेर बोलाएपछि गण्डकी प्रदेश सभापति शुक्रराज शर्मा, कास्की सभापति किशोरदत्त बराल र नेता यज्ञबहादुर थापा आजै काठमाडौं आउन लागेको बताइएको छ । आफूहरुलाई सभापतिले काठमाडौं आउनू भनेकाले जान लागेको कास्की कांग्रेसका सभापति किशोर बरालले जानकारी दिए ।
यता कास्की कांग्रेसले आफूहरु पोखरा नछोड्ने अडान र उता नेकपा एसले आफूलाई पोखरा महानगर नै चाहिने बताएपछि पार्टी सभापति देउवा अप्ठेरोमा पर्नुभएको छ ।
