काठमाडौं । सत्तारुढ गठबन्धनको गाँठो पोखरा महानगरमा पुगेर अड्किएको छ । देशभरका ६ वटा महानगरपालिकामा सत्तारुढ पाँच दलीय गठबन्धनले सिट बाँडफाँट गर्ने क्रममा पोखरा महानगर कसले पाउने भन्नेमा पुगेर अड्किएको हो ।
खासगरी पोखरा महानगरमा नेपाली कांग्रेस र नेकपा एस दुवैले दाबी गरेपछि विवाद उत्पन्न भएको हो । सोमबार दिनभर बालुवाटारमा भेला भएर छलफल गर्दा पनि यस विषयमा सहमति जुट्न सकेन । त्यसपछि मंगलबार विहान साढे ११ बजे बस्ने गरेर शीर्ष नेताहरु उठेका समाचारमा जनाइएको छ ।
हिजोको बालुवाटार बैठकमा ६ वटा महानगरको भागवण्डा मिलाएर उपमहानगरमा प्रवेश गर्ने भनिएको थियो । जसअनुसार ५ वटा महानगरको भागवण्डामा भने सहमति नजिक पुगेको बताइएको छ । जसअनुसार कांग्रेसले काठमाडौं, ललितपुर र विराटनगर, माओवादी केन्द्रले भरतपुर र जनता समाजवादी पार्टीले वीरगञ्जको मेयर पाउने प्रारम्भिक सहमति भएको छ । तर पोखरामा भने नेकपा एसको दाबी छ ।
यसअघि एमालेले जितेका स्थानमा आफूहरुको दाबी हुने नेकपा एसले यसअघि नै भनेको थियो । त्यसमा कांग्रेसले पनि दाबी गरेको छ । कांग्रेसले यसअघिको मत परिणामका आधारमा यहाँ आफ्नो दाबी प्रस्तुत गरेको छ । कांग्रेस सभापति शेरबहादुर देउवालाई पोखरा कुनै पनि हालतमा नछोड्न पोखराका नेता कार्यकर्ताहरुबाटै दबाब छ ।
उनीहरुले कुनै पनि हालतमा पोखरा नछोड्न भनिरहेका छन् । जसका कारण सभापति देउवा पनि अप्ठेरोमा परेको बुझिएको छ । यसका लागि आज नै बैठक बस्ने भनिएको छ । एकजना कांग्रेस नेताले भने– हामी आज बैठक गरेर यो विषयमा टुंग्याउने छौँ । उनका अनुसार आजको बैठकले उपमहानगर पनि आजको बैठकमा टुंग्याइने छ ।
