काठमाडौँ । नेकपा एमालेका अध्यक्ष केपी शर्मा ओलीले सत्तारुढ गठबन्धनले चुनाव सार्ने षड्यन्त्र गरिरहेको आरोप लगाएका छन् । उनले सोमबार सोलुखुम्बु पुगेर यस्तो आरोप लगाए । ओलीले भने, ‘अहिले पनि सत्तारुढ गठबन्धन चुनाव सार्न बालुवाटारमा बैठक बस्दै छ, चुनाव सार्ने षड्यन्त्र भइरहेको छ ।’
उनले चुनाव सार्ने षड्यन्त्र नगर्न प्रधानमन्त्री शेरबहादुर देउवालाई चेतावनी समेत दिए । प्रधानमन्त्री देउवाको ध्यानाकर्षण गराउँदै ओलीले भनेका थिए– चुनाव सार्ने चेष्ट नगरियोस्, बालुवाटारका बैठकमा यस्तो विषयमा छलफल नहोस् ।
त्यसको प्रतिउत्तर दिएका थिए काठमाडौँबाट नेकपा (माओवादी केन्द्र)का अध्यक्ष प्रचण्डले । देशव्यापीरुपमा स्थानीय तहको निर्वाचनको प्रक्रियामा सबै राजनीतिक दल जनताकोबीचमा गइरहेका बेला निर्वाचन सर्छ भनेर गरिएको प्रचार सत्य नरहेको उनको भनाई थियो ।
आजै पार्टी कार्यालयमा पत्रकार सम्मेलन गरेर प्रचण्डले भनेका थिए “केही मानिसले त निर्वाचन हुने दिनको बिहानसम्म पनि निर्वाचन सर्दैछ रे नी हो ? भनेर जिज्ञासा राख्ने गरेको पाइन्छ । यो नेपालमा एक खालको प्रवृत्ति पनि देखिएको छ, गठबन्धनमा आबद्ध दलका तर्फबाट यस्तो विषयमा कहीँकतै पनि चर्चा भएको छैन । चुनाव वैशाख ३० गते नै हुन्छ, गरिन्छ ।”
उनले नेत्रविक्रम चन्द समूहलाई निर्वाचनमा सहभागी गराउने भन्दै निर्वाचन सार्न लागिएको आरोप आफूमाथि लाग्ने गरेको पनि बताए । तर उनले भने “विप्लब समूहलाई निर्वाचनमा कसरी सहभागी गराउने भन्नेबारेमा गठबन्धन दलका बीचमा साझा मत छ । उहाँहरु पनि निर्वाचनमा सहभागी हुन्छौँ भनेर आउनुभएको छ । त्यसको सम्मान गर्नुपर्छ ।”
उता प्रमुख निर्वाचन आयुक्तको अभिव्यक्ति पनि चुनाव सार्ने खालको थियो । हालै निर्वाचन आचारसंहिता विषयको एक कार्यक्रममा प्रमुख निर्वाचन आयुक्त दिनेश थपलियाले भनेका थिए– दुई चार दिन निर्वाचन सार्नुलाई आफसोच मान्नु पर्दैन तर लामो समय भने निर्वाचन सर्दैन । उनले पनि प्रमुख राजनीतिक दलका नेताहरुले जस्तो चुनाव सर्ने या नसर्ने विषयमा राजनीतिक भाषण नै गर्दै हिँड्ने गरेका छन् । जुन विल्कुलै अमिल्दो देखिन्छ ।
साेमबार नै निर्वाचन आयोगले करिब ४४ जिल्लालाई पुग्ने मतपत्र छापेको जानकारी पत्रकार सम्मेलन गरेर दिएको थियो । तर हिजोसम्म पनि प्रमुख निर्वाचन आयुक्त भने दुइ चार दिन नै किन नहोस् निर्वाचन सर्ने या सार्ने विषयमा कुरा गर्दैछन् ।
एकातिर जिम्मेवार यी नेता र पदाधिकारीहरुबाट अहिले आएर निर्वाचन सार्ने विषयलाई बहसको विषय बनाइनु र अर्कातर्फ गठबन्धन दलका नेताहरुले चुनावी गठबन्धनको मोडालिटी तयार पार्न नसकेर बैठक सारेको सारै गर्नुले पनि चुनाव सार्ने काममा सघाउने हो कि भन्ने आशंका जनतामा जन्मिनु स्वाभाविकै हो ।
त्यसमा फेरि माथि गठबन्धनले गरेको निर्णयलाई स्थानीय पालिकाहरुमा आफ्ना पार्टीका कार्यकर्ताहरुले नमान्ने मुख्य त्रास त कांग्रेसमा छँदैछ । त्यसबाट पनि कांग्रेस सबैभन्दा बढी र त्यसपछि माओवादी डराएको छ । यिनै कारणहरुले गर्दा चनाुवाका विषयमा बालुवाटरमा के पाक्दैछ भन्ने जिज्ञासा जनतामा बढेको देखिएको छ ।
