काठमाडौँ । नेपालको विकासका लागि सञ्चालित संयुक्त राष्ट्रसंघलगायत १३ वटा विदेशी दातृ संस्था, विकास साझेदार र अन्तराष्ट्रिय गैरसरकारी संस्थाहरुले चुनावको बेला कुनै पनि चन्दा नदिने र यस्ता कार्यका लागि आफ्ना कर्मचारीहरुलाई जबरजस्ती नगर्न अपिल गरेका छन् ।
संयुक्त राष्ट्रसंघ, युरोपियन युनियन, एसडिसी, यूकेएड, जाइका, नर्वेजियन राजदूतावास, फिनल्याण्डको विदेश मन्त्रालय, अष्ट्रेलियन एड, जिआइजेड, एसयनभी, कोइका, अमेरिकन राजदूतावास र अन्तराष्ट्रिय गैरसरकारी संस्था महासंघले संयुक्त अपिल जारी गर्दे नेपालको आउँदो निर्वाचन वा अन्य कुनै पनि समयमा चन्दा,नगद वा जिन्सी उपलब्ध नगराउने उल्लेख गरेका छन् ।
अपिलमा भनिएको छ कर्मचारी वा साझेदारहरुप्रति लक्षित कुनै प्रकारको जबरजस्ती,त्रास वा धम्की दिने कार्य स्वीकार्न हुन सक्दैन । अपिलमा आफूले सञ्चालन गरिरहेका परियोजना र त्यहाँ कार्यरत कर्मचारीहरुले सामना गर्नुपरेका चुनौतीहर प्रति चासो रहेको उल्लेख गरेका छन् ।
अपिलमा निर्वाचनको समयमा पनि विकास गतिविधिलाई बिनाअवरोध निरन्तरता दिन सरकार,राजनीतिक दल सरोकारवालाहरुसँग अनुरोध गरेका छन् ।
