धनगढी । कैलालीका अर्जुन दासको हत्या गरेको आरोपमा चार जना पक्राउ परेका छन् । शुक्रबार महानगरीय अपराध महाशाखा टोलीले हत्या आरोपमा पक्राउ गरेका चार जनालाई सार्वजनिक गरेको हो ।
कैलालीमा घाँटी छिनालेर रुखमा झुन्ड्याइएको अवस्थामा फेला परेका जानकी गाउँपालिका–९ अमरावतीका अर्जुन दासको हत्या आरोपमा झन्डै तीन महिनापछि चार जनालाई प्रहरीले रुपन्देहीको सिदार्थनगर नगरपालिका–१ बेलहिया सीमानाकाबाट पक्राउ गरेको हो ।
प्रहरीका अनुसार हत्या आरोपमा सुमित साउद, मनोज भण्डारी, दिलीप दास र बम बोहरालाई भारतमा लुकिछिपी बसेको अवस्थामा पक्राउ गरिएको हो । हत्याका मुख्य अभियुक्त मनोज भण्डारी भएको प्रहरीले जनाएको छ । हत्यापछि मनोजले एक जनालाई फोन नै गरेर दासको हत्या गरेको भनेको अडियो नै सार्वजनिक भएको थियो । यस्तै, भण्डारीले भारतबाटै हत्यारा हौं पक्राउ गरेर देखा भन्दै भिडियो नै सार्वजनिक गर्दै प्रहरीलाई चुनौती दिएका थिए ।
पुस पहिलो साता दासको घाँटी रेटेर टाउको छिनालेर रुखमा बाँधिएको अवस्थामा शव फेलापरेको थियो । स्थानीय अमरावती सामुदायिक वनको जंगलमा नग्न अवस्थामा घाँटी रेटेको अवस्थामा दासको शव फेला परेको थियो ।
