काठमाडाैंः पाकिस्तानका पूर्व प्रधानमन्त्री इमरान खान नेतृत्वको पाकिस्तान तेहरीक-ए-इन्साफ (पीटीआई)ले पाकिस्तानको संसद् (नेसनल एसेम्ब्ली) बाट सामूहिक राजीनामा दिने निर्णय गरेको छ ।
आफ्नै पार्टीका केही सांसदले दल त्याग गरी विपक्षीलाइ सघाएपछि इमरान खानले आइतबार भएको मतदानमा संसदबाट विश्वासको मत पाउन सकेका थिएनन् । पाकिस्तानको इतिहासमा कुनै प्रधानमन्त्री संसदमा विश्वासको मत गुमाएर पदच्यूत भएको यो पहिलो घटना थियो ।
पाकिस्तानको संसदले आज सोमबार नयाँ प्रधानमन्त्री चुन्दैछ, र यसमा पाकिस्तानको विपक्षी दल पाकिस्तान मुस्लिम लिग–नवाज (पीएमएल–एन) का नेता शहबाज शरिफ प्रधानमन्त्री चुनिने सम्भावना बढी छ । उनी पाकिस्तानका पूर्व प्रधानमन्त्री नवाज शरिफका भाइ हुन् ।
पीटीआईका अध्यक्ष इमरान खानको अध्यक्षतामा सोमबार बसेको संसदीय दलको बैठकले अवाञ्छित तबरबाट सरकार गठन हुन लागेको भन्दै त्यसको विरोधमा राजीनामा दिने निर्णय गरेको पीटीआईका नेता फारुख हबिबले बताएकाे डनले लेखेकाे छ ।
पार्टीको यस घोषणासँगै सांसद मुराद सईदले राजीनामा बुझाएका छन् । उनी संसदबाट राजीनामा गर्ने पहिलो व्यक्ति हुन् । उनले पाकिस्तानमा सरकार बनाउने र भत्काउने कार्यमा विदेशी हस्तक्षेप हुनु आफूहरुका लागि कदापी स्वीकार्य नहुने पनि बताए ।
पाकिस्तानको संसदमा आइतबार मध्यरातमा भएको मतदानमा १७४ सांसद खानको विपक्षमा उभिएका थिए । ३४२ सदस्यीय पाकिस्तानी संसदमा भएको मतदान मार्फत आफ्नो पद जोगाउन खानलाई कम्तीमा १७२ सांसदको समर्थन आवश्यक पर्थ्यो ।
नयाँ प्रधानमन्त्रीले सन् २०२३ को अक्टोबरमा अर्को चुनाव नहुन्जेलसम्म सत्ता सम्हाल्नेछन् ।
सत्ताबाट इमरान खानको बहिर्गमनसँगै पाकिस्तानभर पीटीआईका नेता कार्यकर्ता प्रदर्शनमा उत्रिएका छन् ।
