एजेन्सी । इंग्लिस प्रिमियर लिग फुटबल अन्तर्गत आर्सनलले ब्राइटनसँग पराजय ब्यहोरेको छ । शनिबार राति भएको खेलमा आर्सनल ब्राइटनसँग आफ्नै मैदानमा २–१ गोलले स्तब्ध बनेको हो ।
ब्राइटनलाई जित दिलाउन खेलको २८ औं मिनेटमा लिन्ड्रो ट्रोसार्डले तथा ६६ औं मिनेटमा इनोक एम्वेपुले गोल गरे ।
आर्सनलका लागि ८९ औं मिनेटमा मार्टिन ओडेगार्डले सान्त्वना गोल फर्काए । पराजित आर्सनल ३० खेलबाट ५४ अंकसहित तालिकाको पाँचौं स्थानमा रहेको छ भने ब्राइटन ३१ खेलबाट ३७ अंकसहित तालिकाको ११ औं स्थानमा रहेको छ ।
शनिबार राति नै भएको अर्को खेलमा टोटेनहमले एस्टन भिल्लालाई उसकै मैदानमा ४–० गोलले पराजित गरेको छ ।
टोटेनहमलाई जित दिलाउन सन हेउंग मिनले ३, ६६ र ७१ औं मिनेटमा गोल गर्दै ह्याट्रिक गर्दा ५० औं मिनेटमा डेजान कुलुसेभेस्कीले एक गोल गरे ।
जितसँगै टोटेनहम ३१ खेलबाट ५७ अंकसहित तालिकाको चौंथो स्थानमा रहेको छ भने एस्टन भिल्ला ३१ खेलबाट ३६ अंकसहित १२ औं स्थानमा रहेको छ ।
