काठमाडौँ । नेपाल बार एसोसिएसनको निर्वाचनमा सत्ता साझेदार दलनिकट कानून व्यवसायीहरूको संयुक्त प्यानल विजयी भएको छ ।
अध्यक्ष पदमा गोपालकृष्ण घिमिरेसहित सबै पदमा सत्ता साझेदार दलनिकट उम्मेदवारहरू विजयी भएका हुन् ।
अध्यक्ष पदमा घिमिरेले विष्णुमणि अधिकारीलाई पराजित गरेका हुन् । घिमिरे नेपाली कांग्रेसनिकट डेमोक्रेटिक लयर्स एसोसिएसनका पूर्व अध्यक्षसमेत हुन् भने अधिकारी नेकपा एमालेनिकट प्रगतिशील तथा पेशागत कानून व्यवसायी समूहका उम्मेदवार हुन् ।
त्यस्तै महासचिवमा सत्ता साझेदार उम्मेदवार अञ्जिता खनाल र कोषाध्यक्षमा भरतबहादुर राउत विजयी भएका छन् । २५ सदस्यीय कार्यसमितिका अन्य पदाधिकारी र सदस्यहरुमा पनि घिमिरे प्यानलकै उम्मेदवारहरु विजयी भएका छन् ।
यही चैत १९ गते भएको निर्वाचनमा सात हजार ४२९ मत खसेको थियो ।
