एजेन्सी । युरोपा लिग फुटबल अन्तर्गत क्वाटरफाइनलको पहिलो चरणमा स्पेनिस फुटबल क्लब बार्सिलोनाले बराबरी खेलेको छ ।
बिहीबार राति भएको खेलमा बार्सिलोनाले जर्मन क्लब फ्रांकफर्टसँग १-१ गोलको बराबरी खेलेको हो । फ्रांकफर्टले आफ्नो घरेलु मैदानमा खेलको ४८ औं मिनेटमा अन्सगर नाउफको गोलबाट सुरुवाती अग्रता लिएको थियो ।
तर, खेलको ६६ औं मिनेटमा फेरान टोरेसले गोल गर्दै बार्सिलोनालाई हारबाट जोगाए । अब यी दुई टिमले सेमिफाइनल प्रवेशका लागि अर्को हप्ता(अप्रिल १५)मा दोस्रो चरण खेल्नेछन् ।
यस्तै, हिजो राति नै भएको अर्को पहिलो चरणमा इंग्लिस क्लब वेस्टहाम युनाइटेड र फ्रेन्च फुटबल लियोनले बराबरी खेलेका छन् ।
वेस्टहामको घरेलु मैदानमा भएको खेलमा दुबै टिमले १-१ गोलको बराबरी खेल्दै पहिलो चरण सकाएका हुन् । खेलको ५२ औं मिनेटमा जारोर्ड बोएनले गोल गर्दै वेस्टहामलाई सुरुवाती अग्रता दिलाएका थिए ।
यता, खेलको ६६ औं मिनेटमा टांगी एन्डोम्बेलेले गोल गर्दै लियोनलाई हारबाट जोगाए ।
अब यी दुई टिमबीच दोस्रो चरणको खेल अर्को हप्ता बिहीबार मध्यरातमा लियोनको मैदानमा हुनेछ ।
