काठमाडौं । मानिसहरुलाई स्वास्थ्य कायम राख्नका लागि पौष्टिक आहारका साथसाथै पर्याप्त निद्रा पनि आवश्यक हुन्छ । तर आजकल विभिन्न कारणवश मानिसहरू पर्याप्त सुत्दैनन् । यसले गर्दा स्वास्थ्यसम्बन्धी कैयौं समस्याहरू आउँछन् ।
अमेरिकाको राष्ट्रिय निद्रा फाउन्डेसनले गरेको अनुसन्धानअनुसार, उमेरको हिसाबमा हामी सबैले फरक फरक अवधिको निद्रा पूरा गर्नुपर्छ । पूरा निद्रा लिँदा मात्र अनेकौं रोगबाट बच्न सकिन्छ ।
शून्यदेखि तीन महिनाको बच्चाले १४ देखि १७ घन्टा सुत्नुपर्छ भने चारदेखि ११ महिनाको बच्चाले १२ देखि १५ घन्टा सुत्नुपर्ने एक अध्यायन देखाएको छ ।
अध्यायनका अनुसार एकदेखि दुई वर्षको बच्चाले ११ देखि १४ घन्टा सुत्नुपर्ने उल्लेख गरेको छ भने तीनदेखि पाँच वर्षको बच्चाले १० देखि १३ घन्टा सुत्नुपर्छ ।
यस्तै ६ देखि १३ वर्षको बच्चाले नौदेखि ११ घन्टा सुत्दा पुग्छ भने चौधदेखि १७ वर्षको किशोरले आठदेखि १० घन्टा सुत्नुपर्छ ।
अठारदेखि ६४ वर्षको मानिसले आठदेखि नौ घन्टा सुत्दा पुग्छ भने पैंसट्ठी वर्षभन्दा माथिको मानिसले सात घन्टा सुत्नुपर्छ ।
