तनहुँ । पुर्पक्षका लागि जिल्ला कारागार तनहुँमा थुनामा रहेका अभिनेता पल शाहलाई मङ्गलबार बिहान नवलपुर पठाइएको छ । शाहलाई नवलपुर जिल्ला अदालतमा दर्ता भएको जबर्जस्ती करणी मुद्दामा थुनछेक बहसका लागि नवलपुर पठाइएको हो ।
सोमबार नवलपुर जिल्ला अदालतबाट आएको थुनछेक बहस प्रयोजनका लागि उपस्थित गराइदिनु भन्ने पत्रानुसार शाहलाई नवलपुर पठाइएको हो ।
जिल्ला न्यायाधीश हरिशचन्द्र ढुङ्गानाको यही चैत १० गतेको आदेशपछि उनी पुर्पक्षका लागि थुनामा छन् ।
जिल्ला अदालत नवलपुरमा गत चैत ३ गते शाहविरुद्ध मुद्दा दर्ता भइसकेको छ । मुलुकी अपराध संहिता २०७४ को दफा २१९ को १ र २ अनुसारको कसूर गरेको दाबी गर्दै शाहविरुद्ध नवलपुरमा मुद्दा दायर भएको थियो ।
उक्त दफामा महिलाको मन्जुरी नलिई करणी गरेमा बलात्कार हुने र १८ वर्षभन्दा कम उमेरकी महिलासँग मञ्जुरीमै करणी गरे पनि बलात्कार हुने उल्लेख छ ।
नवलपरासी पूर्वको एक रिसोर्टमा २०७७ चैत ७ गते आफूमाथि बलात्कार भएको दाबी गर्दै किशोरीले जाहेरी दिएसँगै शाहलाई गत फागुन २४ गते नवलपरासी पूर्वमा पनि झिकाएर प्रहरीले बयान लिएको थियो ।
