एजेन्सी । आर्थिक संकटबाट गुज्रिरहेको बेला श्रीलंकाका मन्त्रीहरुले सामूहिक राजीनामा दिएका छन् । प्रधानमन्त्री महिन्दा राजापाक्षे बाहेक श्रीलंकाका सबै २६ जना मन्त्रीहरुले सामूहिक राजीनामा दिएको बीबीसीले जनाएको छ ।
यसबारे मन्त्रिपरिषद्ले जानकारी दिएको श्रीलंकाका शिक्षामन्त्री तथा संसदीय दलका नेता दिनेश गुणवर्द्धनेले बताए । राष्ट्रपति गोताबाया राजापाक्षे र प्रधानमन्त्री महिन्द राजापाक्षे बाहेक २६ मन्त्रीले श्रीलंकाका प्रधानमन्त्रीलाई राजीनामा बुझाएको उनले बताए । यद्यपी, उनले मन्त्रिपरिषद्को यो सामूहिक राजीनामाको कारण भने खुलाएका छैनन् ।
मन्त्रिपरिषद्को राजीनामा अघि देशका खेलकुदमन्त्री तथा प्रधानमन्त्री राजापाक्षेका छोरा नमल राजापाक्षेले आफ्ना सबै विभागबाट राजीनामा दिएका थिए । करिब एक घण्टापछि अन्य मन्त्रीहरूले पनि राजीनामा दिए । मन्त्रिपरिषद्को राजीनामा पत्र अहिले प्रधानमन्त्रीसँग छ भने त्यसलाई राष्ट्रपति गोताबाया राजापाक्षेलाई हस्तान्तरण गरिनेछ ।
आगामी दिनमा नयाँ मन्त्रिपरिषद् गठन हुने बताइएको छ । यसअघि आइतबार राजधानी कोलम्बोमा सरकारविरुद्ध प्रदर्शन गरेको आरोपमा ६५० भन्दा बढीलाई पक्राउ गरिएको थियो । सो समूहले आर्थिक मन्दीको विरोधमा कर्फ्यु तोडेर सरकारविरुद्ध र्याली निकालेका थिए । श्रीलंकामा सामाजिक सञ्जालमा समेत प्रतिबन्ध लगाइएको छ ।
आइतबारदेखि देशभर फेसबुक, ट्विटर, ह्वाट्सएप र इन्स्टाग्रामलगायतका सबै सामाजिक सञ्जाल सेवा बन्द भएका छन् । इन्टरनेट निगरानी संस्था नेटब्लक्सले यो जानकारी दिएको हो ।
उता, राजधानी कोलम्बोमा स्थिती तनावग्रस्त नहोस् भनेर सेना र प्रहरीलाई हरेक कुनामा तैनाथ गरिएको छ । श्रीलंकामा गहिरो आर्थिक समस्याका बीच राष्ट्रपति गोताबाया राजापाक्षेले शुक्रबार संकटकालको घोषणा गरेका छन् । सरकारले शनिबार साँझ ६ बजेदेखि सोमबार बिहान ६ बजेसम्म ३६ घण्टा कर्फ्यु लगाएको छ ।
