काठमाडौं । सरकारले सांसदलाई बाँडिँदै आएको दसैँ भत्ता खारेज गरेको छ । कोरोना महामारीले अर्थतन्त्र थिलथिलोको बनाएका बेला पनि सांसदले भत्ता लिएको भन्दै चौतर्फी आलोचना भएपछि संघीय संसद् सचिवालयले सांसदको दसैं भत्ता खारेज गरेको हो ।
तत्कालीन प्रधानमन्त्री केपी शर्मा ओली नेतृत्वको सरकाको निर्णय अनुसार २०७६ सालदेखि सांसदलाई दसैँ भत्ता बाँडिँदै आएको थियो । मन्त्रिपरिषद्ले दसैं भत्ता उपलब्ध गराउने निर्णय नगरेको भन्दै सचिवालयले दसैं भत्ता बाँड्ने प्रचलन अन्त्य गरिएको जनाएको छ ।
मंगलबार संसद् सचिवालयले सांसदहरुलाई असोज महिनाको तलब खातामा पठाएको छ। असोज महिनाको तलबबापत सांसदलाई कुल दुई करोड ९८ लाख ४६ हजार पठाएको छ भने सांसदका पिएका लागि एक करोड ४३ लाख ७४ हजार निकासा गरेको सचिवालयले जनाएको छ ।
सांसदहरूले मासिक तलबबापत ६६ हजार ७० रुपैयाँ पाउँछन् । उनीहरुले तलबबाहेक बैठक भत्ता र यातायात खर्च छुट्टै पाउँछन् ।
