काठमाडौं । राष्ट्रिय मानव अधिकार आयोगले अधिकार रक्षक दयाराम परियारको स्मृतिमा हुलाक टिकट प्रकाशनका लागि पहल गर्ने भएको छ ।
परियारको १६औँ स्मृति दिवसका अवसरमा आज यहाँ आयोजित श्रद्धाञ्जलि कार्यक्रममा आयोगका कार्यवाहक अध्यक्ष डा सूर्यप्रसाद शर्मा ढुङ्गेलले हुलाक टिकट प्रकाशनका लागि आयोगले तत्काल पहल गर्ने बताउनुभयो । परियारको नाममा ‘मानव अधिकार रक्षक लेखनवृत्ति’का लागि चालु आर्थिक वर्षमै बजेटको व्यवस्था गरिने उहाँले जानकारी दिनुभयो ।
श्रद्धाञ्जलि कार्यक्रममा परियारका दाजु प्रकाशचन्द्र परियारले दयारामले मानव अधिकार संरक्षणका दौरान शहादत प्राप्त गरेको भए पनि अझै पनि न्याय प्राप्त गर्न नसकेको गुनासो गर्नुभयो । दयारामलाई सहिद घोषणा गर्न आवश्यक पहल गर्नसमेत उहाँले आयोग समक्ष माग गर्नुभयो । दयारामका बारेमा वृत्तचित्र निर्माण र पुरस्कार स्थापना गर्नुपर्ने परियारको भनाइ थियो ।
मानव अधिकार आयोगका तत्कालिन जनकपुर सम्पर्क कार्यालयमा कार्यरत अधिकारकर्मी परियारको १६ वर्ष अघि प्रहरीको गोली लागि निधन भएको थियो । न्याय प्राप्तिका लागि आवश्यक पहल गरिने आयोगका प्रवक्ता डा टीकाराम पोखरेलद्वारा जारी विज्ञप्तिमा उल्लेख छ । श्रद्धाञ्जलि कार्यक्रममा आयोगका सदस्यद्वय मिहिर ठाकुर र मनोज दुवाडी, आयोगका निमित्त सचिव, सहसचिव, कर्मचारीलगायतको उपस्थिति रहेको थियो । रासस
