काठमाडौं । नेकपा एमालेका अध्यक्ष केपी शर्मा ओलीले स्थानीय तहको निर्वाचनमा बहुमत हासिल गर्ने दिशामा अघि बढ्न निर्देशन दिनुभएको छ ।
बुधबार काठमाण्डौमा सुरु पार्टीको केन्द्रीय कमिटी बैठकमा अध्यक्ष ओलीले लोकतान्त्रिक आन्दोलनको सबैभन्दा ठूलो र पुरानो शक्ति एमाले भएकाले लोकतन्त्रको रक्षाका लागि स्थानीय तहको निर्वाचनमा बहुमत हासिल गर्नुपर्ने बताउनुभएको हो । द्धन्द र हिंसाबाट गुज्रिएको मुलुकमा दिगो शान्ति स्थापना तथा सुशासन र भ्रष्टाचार मुक्त गरि देशलाई समृद्ध नेपाल सुखी नेपाली सम्म पुराउने अभिभारा पुरा गर्न बहुसंख्याको अभिमतबाट स्थानीय तहको निर्वाचन जित्नुपर्ने तर्क उहाँको थियो । उहाँले भ्रमपुर्ण, सत्तापक्षीय र जनविरोधी प्रचारहरु भएको दाबी गर्दै त्यसविरुद्ध बहुसंख्याको अभिमत प्राप्त गरि स्थानीय तहको निर्वाचनबाट पार्टीलाई बलियो बनाउनुपर्नेमा जोड दिनुभयो ।
उहाँले भन्नुभयो ‘नेपालको लोकतान्त्रिक आन्दोलनमा हामी मुख्य शक्ति हौ । मुल धार हौं । इतिहासको लोकतान्त्रिक आन्दोलनकोे विरासत हामीसंग छ । आजको समस्या र चुनौतिको सामना र समाधान गर्नुपर्ने उत्तरदायीत्व हामी संग छ । त्यो अभिभारा हामीसंग छ । देशलाई समृद्ध नेपाल सुखी नेपाली सम्म पुराउने अभिभारा हामीसंग छ । जसलाई हामीले सम्पन्न गर्नुपर्ने छ । त्यो अभिभारा हामी जनताको बहुसंख्याको अभिमतद्धारा बल र अधिकार प्राप्त गर्दछौ । यसका लागि स्वभाविक रुपमा आगामी निर्वाचनहरु महत्वपुर्ण छन् । त्यसका लागि केन्द्रमा बहुमतको सरकार बनेपछि पनि विकास केन्द्रीय केही आयोजना बाहेक जनताको घर दैलोमा पुराउने स्थानीय तह हो । त्यसकारण स्थानीय तहको निर्वाचनमा हामीले महत्वपुर्ण ठाउँहरुमा र आम रुपमा बहुमत साथको विजय हासिल गर्न सकेनौ भने हामीले बहुमत प्राप्त गर्दा पनि सहज नहुने स्थिति हुन्छ । त्यसकारण हामीेले यसमा बहुमत प्राप्त गर्नुपर्ने छ ।’
उहाँले नेकपा एमालेको नेतृत्वमा सम्पुर्ण लोकतान्त्रिक आन्दोलनको भएको र सबै भन्दा ठूलो प्रमुख राजनीतिक पार्टी भएको दाबी पनि गर्नुभयो ।
उहाँले भन्नुभयो ‘नेकपा एमाले देशको सबै भन्दा ठूलो प्रमुख राजनीतिक पार्टी हो । जननिर्वाचित संस्थाहरुमा प्रतिनिधित्वका दृष्टिले, राष्ट्रलाई अघि बढाउने नीतिगत विषय र व्यवहारिक प्रश्नमा हामी प्रमुख पार्टी हौँ । लोकतान्त्रिक आन्दोलनको मुल धार हामी हौ । अनेक हिसाबबाट नेकपा एमाले नै सबै भन्दा पुरानो र मुल धार बोकेको पार्टी हो भन्न अप्ठ्यारो मान्नुपर्ने अवस्था छैन । ’
केन्द्रीय कमिटि बैठकले स्थानीय तहको निर्वाचन सफलतापुर्वक समपन्न गराउन संगठनात्मक र प्रचारात्मक कार्याक्रम तथा जनपरिचालन सम्बन्धी महत्वपुर्ण निर्णय गर्ने छ । त्यसैगरी भोलीको बैठकमा निर्वाचन केन्द्रीत गरेर बनाईएको पार्टीको एप बारे केन्द्रीय कमिटी सदस्यलाई जानकारी गराउने पनि अध्यक्ष ओलीले जानकारी दिनुभयो । उहाँले नेकपा एमालेमा प्रवेश गर्ने लहर बढेसंगै सदस्यता सख्या ११ लाख पुगेको आकलन गरिएको दाबी पनि गर्नुभयो ।
