हेटौंडा । बागमती प्रदेश सभाको आज बस्ने बैठकमा मुख्यमन्त्री अष्टलक्ष्मी शाक्यले विश्वासको मत लिने भएकी छन् । आइतबार बागमती प्रदेश सभाको नवौं अधिवेशन अन्तर्गत अपराह्न ३ बजे बस्ने बैठकमा मुख्यमन्त्री शाक्यले विश्वासको मत लिने भएकी हुन् ।
एमाले विभाजन भएसँगै बागमतीका १३ सांसदले नेकपा एकीकृत समाजवादी पार्टी रोजेपछि प्रदेशकी मुख्यमन्त्री शाक्य अल्पमतमा परेपछि विश्वासको मत लिन लागेकी हुन् ।
प्रदेश सभा सचिवालयका सचिव कृष्णहरी खड्काले आजै ११ बजे बस्ने कार्यव्यवस्था परामर्श समितिले नै आजको कार्यसूची टुंगो लगाउने बताए ।
बागमती प्रदेश सभाका कूल १०९ सांसदमध्ये एमालेका ४३, कांग्रेसका २२, माओवादीका २३, समाजवादीका १३, विवेकशील साझाका ३, नेमकिपाका २, राप्रपाका २ र स्वतन्त्र सांसद एक जना छन् ।
विश्वासको मत पाउन शाक्यलाई ५७ मत आवश्यक पर्छ । गठबन्धनमा रहेका दलहरुको बहुमत रहेका कारण शाक्यले विश्वासको मत पाउने सम्भावना न्यून छ ।