काठमाडौँ । आईसीसी टी–२० विश्वकप क्रिकेट अन्तर्गत आज (आइतबार) दुई खेलहरु हुँदैछन् ।
युएई र ओमानमा संयुक्त रुपमा आयोजित क्रिकेट प्रतियोगितामा आज विश्वकै नजरमा रहेको भारत र पाकिस्तानबीचको खेल पनि हुँदैछ ।
दुबई इन्टरनेशनल क्रिकेट रंगशालामा हुन लागेको भारत र पाकिस्तानबीचको खेल राति पौने ८ बजे सुरु हुनेछ। भारत र पाकिस्तानबीच क्रिकेट खेललाई एक अर्काको प्रतिष्ठासँग जोडेर समेत हेरिने गरिएको छ।
सन् २०१९ को एक दिवसीय विश्वकपपछि भारत र पाकिस्तानबीच पहिलो पटक प्रतिस्पर्धा हुन लागेको हो ।
इतिहास हेर्दा भारतले पाकिस्तानविरुद्ध टी–ट्वान्टी विश्वकप अन्तर्गत अहिलेसम्म खेलेका सबै (पाँच खेल) आफ्नो पक्षमा पारेको छ । यस पटक पाकिस्तान भारतसँगको हारको यात्रामा पूर्णविराम लगाउने लक्ष्यका साथ मैदानमा उत्रनेछ ।
सन् २००७ मा आयोजना भएको पहिलो टी–ट्वान्टी विश्वकपमा भारत च्याम्पियन बन्दा पाकिस्तान उपविजेता बनेको थियो । पाकिस्तानले सन् २००९ को उपाधि जितेको थियो ।
त्यस्तै, आज नै बंगलादेश र श्रीलङ्काबीच पनि खेल हुँदैछ । सो खेल दिउँसो पौने ४ बजे सुरु हुनेछ ।
