इङलिस प्रिमियर लिग अन्तर्गत आइतबार राति भएको अन्तिम खेलमा लिभरपुलले म्यान्चेस्टर युनाइटेडलाई स्तब्ध बनाएको छ ।
युनाइटेडको घरेलु मैदान ओल्ड ट्राफोर्डमा भएको यस प्रतियोगितामा लिभरपुलले युनाइटेडमाथि ५–० गोल अन्तरले पराजित गरेको थियो । यस खेलमा लिभरपुलका प्रतिभावान खेलाडी मोहम्मद सलाहले तीन गोल गरी ह्याट्रिक पूरा गरेका थिए ।
सलाहले ३८औं, पहिलो हाफको इन्जुरी समय र ५०औं मिनेटमा गोल गरेका थिए । तर लिभरपुलका लागि गोलको खाता नाबी केइटाले पाँचौं मिनेटमै गरेका थिए । अर्को गोल डिएगो जोटाले १३ औं मिनेटमा गरेका थिए ।
अर्थात् लिभरपुलले पहिलो हाफमै युनाइटेड बिरुद्ध चार गोल गरिसकेको थियो ।
दबाबमा परेको युनाइटेडका खेलाडीमा निराशा छाएको थियो । सोही कारण युनाइटेडका खेलाडीहरुले एक पछि अर्को फल खेलेका थिए । खेलको ६०औं मिनेटमा पल पोग्बाले लिभरपुलकै डिबक्स नजिक नबी केइटालाई नराम्रोसँग लडाएपछि रातो कार्ड पाएका थिए ।
यो जितसँगै लिभरपुलले ९ खेलबाट २१ अंक जोड्दै लिगको दोस्रो स्थानमा उक्लेको छ भने म्यान्चेस्टेर युनाइटेडले ९ खेलबाट १४ अंक जोडेर सातौं स्थानमा झरेको छ । पहिलो स्थानमा रहेको चेल्सीको ९ खेलबाट २२ अंक छ ।
इङलिस प्रिमियर लिग अन्तर्गत आइतबार राति भएका खेलमा लेस्टर सिटी र वेस्टह्याम विजयी भएका छन् । लेस्टर सिटीले ब्रेन्टफोर्डलाई २–१ गोल अन्तरले पराजित गरेको छ भने टोटेनह्याम हस्परलाई वेस्टह्याम युनाइटेडले १–० गोल अन्तरले पराजित गरेको छ ।
