इङलिस प्रिमियर लिगमा फितलो प्रदर्शन गरेको भन्दै आलोचना खेपिरहेको म्यान्चेस्टर युनाइटेडले शनिबार रातिको खेलमा लिगमा राम्रो खेलिरहेको टोटेनह्याम हस्परलाई ३–० गोल अन्तरले पराजित गरेको छ ।
म्यान्चेस्टरका लागि पहिलो गोल क्रिस्टियानो रोनाल्डोले ३७औं मिनेटमा गरेका थिए भने दोस्रो गोल एडिन्सन काभानीले ६४औं तथा तेस्रो गोल मार्कस रासफोर्डले ८६औं मिनेटमा गरेका थिए ।
निकै प्रतिस्पर्धात्मक यस खेलमा टोटेनह्यामले पनि गोल गर्ने केही अवसर सिर्जना गरे पनि त्यसलाई गोलमा परिणत गर्न सकेको थिएन ।
अघिल्लो साता म्यान्चेस्टर युनाइटेड लिभरपुलसँग ५–० गोल अन्तरले पराजित भएको थियो । उक्त हारपछि युनाइटेडका प्रशिक्षक ओले गुनार सोल्जारको जागिर धरापमा परेको थियो । तर आज टिमले उत्कृष्ट पुनरागमन गरेको थियो ।
युनाइटेडले लामो तथा छोटो दुरीका पासका साथै अघिपछि गर्दै खेललाई आफ्नो पकड एवं नियन्त्रणमा राखेको थियो ।
यो जितसँगै युनाइटेड १० खेलबाट १७ अंक बनाउँदै लिगको पाँचौं स्थानमा उक्लेको छ । टोटेनह्याम भने १५ अंकका साथ आठौं स्थानमा झरेको छ ।
अंक तालिका
| स्थान | टिम | खेल | अंक |
| १ | चेल्सी | १० | २५ |
| २ | लिभरपुल | १० | २२ |
| ३ | म्यान्चेस्टर सिटी | १० | २० |
| ४ | वेस्टह्याम | ९ | १७ |
| ५ | म्यान्चेस्टर युनाइटेड | १० | १७ |
