ललितपुर । ललितपुरको भैँसेपाटीस्थित फुलबारी मार्गमा अवस्थित श्रीकुल माध्यमिक विद्यालयमा आज देउसी भैलो कार्यक्रम सम्पन्न गरिएको छ । उक्त विद्यालयका संरक्षक एवं राष्ट्रिय समाचार समितिका वरिष्ठ सम्पादक मोहिनी मिश्र रिसालले प्रमुख अतिथिका रुपमा सो कार्यक्रमको उद्घाटन गर्नुभएको थियो ।
विद्यार्थीहरुलाई तिहार पर्वका सांस्कृतिक तथा धार्मिक महत्वका बारेमा जानकारी दिने उद्देश्यले आयोजना गरिएको सो कार्यक्रममा उक्त विद्यिालयका विद्यार्थीहरुले देउसी भैलोका साथै काग पूजा, कुकूर पूजा, लक्ष्मी, गाइगोरु पूजा र भाइटीका गरेका थिए । त्यस देउसी भैलो कार्यक्रममा विद्यालयका अभिभावकहरु तथा ललितपुर महानगरपालिका वडा नं २५ का मदन महतलगायत स्थानीय समाजसेवीहरु पनि उपस्थित हुनुहुन्थ्यो ।
उक्त विद्यालयका प्रिन्सिपल शिवेन्द्र कार्की र भाइस प्रिन्सिपल सिंहराज थापाले विद्यार्थीहरुलाई तिहार पर्वका विविध सांस्कृतिक पक्षहरुका बारेमा जानकारी दिने र यस विषयमा उनीहरुलाई व्यवहारिक बनाउन सहयोग पुगोस भनेर यस कार्यक्रमको आयोजना गरिएको बताउनुभयो ।
