अबुधाबीः भारतले चालु टी–२० विश्वकप क्रिकेट प्रतियोगितामा पहिलो जित हासिल गरेको छ । अबुधाबीमा बुधबार खेलिएको खेलमा भारतले अफगानिस्तानलाई ६६ रनले पराजित गरेको हो ।
टस हारेर पहिले ब्याटिङको निम्तो पाएको भारतले २० ओभरमा २ विकेट गुमाएर २१० रनको विशाल स्कोर खडा गरेको थियो । भारतका लागि रोहित शर्माले ७४, के एल राहुलले ६९, रिषभ पन्त २७ तथा हार्दिक पान्ड्याले ३५ रन बनाए ।
२११ रनको लक्ष्य पछ्याएको अफगानिस्तानलाई भारतीय तिब्र गतिका बलर र स्पिन बलरहरुले ध्वस्त बनाएका थिए । २० ओभरको खेलमा अफगानिस्तानले ७ विकेट गुमाएर १४४ रन मात्र बनाएको थियो ।
भारतका लागि मोहम्मद शामीले ३, रविचन्द्रन अश्विनले २, रविन्द्र जडेजा र जसप्रित बुम्राहले एक एक विकेट लिएका थिए ।
अफगानिस्तानका लागि करिम जनतले ४२ तथा कप्तान मोहम्मद नाबीले ३५ रनको योगदान गरेका थिए । अन्य ब्याट्सम्यानले खासै रन बनाउन सकेनन् ।
यो जितसँगै भारतले प्रतियोगितामै पहिलो जित दर्ता गर्दै २ अंक जोडेको छ । अन्तिम चारमा स्थान बनाउन भारतले आफ्ना बाँकी खेल जित्नै पर्नेछ भने न्यूजीन्याण्डले आफ्नो बाँकी कुनै खेल हार्नु पर्नेछ । नत्र भारत समूह चरणबाटै बाहिरिने छ । एजेन्सी
अंक तालिका
| समूह क | खेल | अंक | समूह ख | खेल. | अंक. |
| इङल्यान्ड | ४ | ८ | अफगानिस्तान | ४ | ४ |
| अस्ट्रेलिया | ३ | ४ | पाकिस्तान | ४ | ८ |
| दक्षिण अफ्रिका | ४ | ६ | भारत | ३ | २ |
| वेस्ट इन्डिज | ३ | २ | न्यूजील्यान्ड | ३ | ४ |
| श्रीलंका | ४ | २ | स्कटल्यान्ड | ३ | ० |
| बंगलादेश | ४ | ० | नामिबिया | ३ | २ |
