सिन्धुली । बीपी कोइराला र पुष्पलाल श्रेष्ठको सालिक अनावरण स्थगित भएपछि आज (बुधबार) बिहानैदेखि तनावग्रस्त बनेको सदरमुकाम सिन्धुलीमाडी अहिले भने केही साम्य बनेको छ ।
प्रमुख जिल्ला अधिकारी रमेश न्यौपानेको कार्यकक्षमा बसेको सर्वदलीय बैठकमा बाल उद्यान पार्कमा रहेको सालिक अनावरण कार्यक्रम स्थगित गर्ने र सिन्धुलीगढी विजयोत्सवमा गठबन्धनले अवरोध नगर्ने सहमति भएपछि विवादले उग्र रुप लिएको हो ।
झडप हुन सक्ने भन्दै त्यसलाई रोक्नका लागि स्थानीय प्रशासनले बाल उद्यान पार्क क्षेत्रमा निषेधाज्ञा समेत जारी गरेको छ ।
बुधबार बिहान ११ बजेदेखि राति १२ बजेसम्म निषेधाज्ञा जारी गर्दै स्टल बजार, जुनार चोक, बसपार्क, ग्वाङखोला पुल, हस्पिटल रोडभित्रका क्षेत्रमा कुनै पनि सभा जुलुस तथा हिँडडुल गर्न रोक लगाइएको छ ।
सालिक अनावरण र सिन्धुलीगढी विजयोत्सवको प्रमुख अतिथिमा एमाले महासचिव ईश्वर पोखरेललाई कमलामाई नगरपालिकाले बोलाएपछि विरोध जनाउँदै सत्तारुढ गठबन्धनले पार्कमा ताला लगाएका थिए ।
