अबुधाबीः न्यूजील्यान्ड टी–ट्वान्टी विश्वकप क्रिकेट प्रतियोगिताको फाइनलमा प्रवेश गरेको छ ।
न्यूजील्यान्डले बुधबार राति भएको सेमिफाइनल खेलमा इङल्यान्डलाई ५ विकेटले पराजित गर्दै फाइनलमा प्रवेश गरेको हो । फाइनलमा न्यूजील्यान्डको यो चौथो प्रवेश हो । यसअघि सन् २०१५, २०१९ र २०२१ मा न्यूजील्यान्ड फाइनलमा प्रवेश गरेको थियो ।
न्यूजील्यान्डका ब्याट्सम्यानद्वय डिरेल मिचेल र डेभोन कन्वेको जोडीले गरेको प्रभावशाली ब्याटिङ मद्दतले न्यूजील्यान्डले फाइनलको यात्रा तय गरेको हो । डिरेल मिचेलले ४७ बलमा ४ छक्का र ४ चौका मद्दतले ७२ रन बनाएका थिए भने कन्वेले ३८ बलमा १ छक्का र ५ चौका सहित ४६ रन बनाएका थिए ।
इङल्यान्डले प्रस्तुत गरेको १६७ रनको मध्यम लक्ष्य न्यूजील्यान्डले ५ विकेटको क्षतिमा १९ औं ओभरमा पूरा गरेको थियो । शुरुमै मार्टिन गप्टिल र कप्तान केन विलियम्सन व्यक्तिगत ४ र ५ रन बनाएर आउट भएपछि न्यूजील्यान्ड दबाबमा परेको थियो ।
न्यूजील्यान्डका लागि ग्लेन फिलिप्सले २, जेम्स निशामले २७ तथा मिचेल सान्टनरले १ रनको योगदान गरे ।
यसअघि पहिले टस हारेर ब्याटिङको निम्तो पाएको इङल्यान्डले संघर्षपूर्ण खेल खेल्दै २० ओभरमा ४ विकेटको क्षतिमा १६६ रनको मध्यम स्कोर खडा गरेको थियो । इङल्यान्डका लागि मोइन अलिले सर्वाधिक ५१ रनको योगदान गरेका थिए ।
साथै, जस बटलरले २९, जोन्नी बेयरस्टले १३, डाविड मलानले ४१, लियाम लिभिङस्टोनले १७ तथा इओन मोर्गनले ४ रन बनाएका थिए । तर उनीहरुले बनाएको यो रनसंख्या पर्याप्त भएन ।
अब फाइनलमा न्यूजील्यान्डको भिडन्त पाकिस्तान वा अस्ट्रेलियासँग हुनेछ । पाकिस्तान र अस्ट्रेलियाबीचको दोस्रो सेमिफाइनल आज दुबईमा हुनेछ । फाइनल खेल भने आगामी आइतबार दुबइमा हुनेछ । एजेन्सी
