• २० असार २०७९, सोमबार
  •      Mon Jul 4 2022
Logo

मतदानको प्रक्रियामा जाने काङ्ग्रेस एमालेको निश्कर्ष



काठमाडौं, ३० पुस । प्रमुख दुई सत्तारुढ दलहरु नेपाली काङ्ग्रेस र नेकपा एमालेले मतदानको प्रक्रियाबाट संविधान जारी गर्नुपर्ने निश्कर्ष निकालेका छन् ।
आज बसेको दुई दलको बैठकले सहमति नभएको र नहुने ठहर गर्दै मतदानको प्रक्रियाबाट नै संविधान जारी गर्नुपर्ने निश्कर्ष निकालेको हो ।
बैठकले सहमतिको प्रयास भने जारी राख्ने निर्णय गरेको नेकपा एमालेका बरिष्ठ नेता माधवकुमार नेपालले जानकारी दिए । बैठकपछि उनले संविधानका विवादित विषयमा सहमति गर्न प्रयास भएपनि मतदानको प्रक्रियामा जाने बारेमा बैठकमा छलफल भएको बताए ।
बिहान देखि प्रधानमन्त्री निवास बालुवाटारमा बसेको बैठकमा मतदानको प्रक्रियामा जानका लागि गर्नुपर्ने तयारीका बारेमा पनि छलफल भएको छ ।
सहमतिको संभावना लगभग सकिएको निष्कर्ष निकालेका दुई दल बहुमतीय प्रक्रियाबाट भए पनि संविधान जारी गर्ने रणनीतिको खोजीमा लागेका हुन् । त्यसका लागि अब गर्नुपर्ने तयारीका लागि जुट्ने दुई दलको निश्कर्ष रहेको बैठकमा सहभागी एक नेताले अनलाइन चौतारीलाई जानकारी दिए ।

बैठकमा नेपाली काङ्ग्रेसका बरिष्ठ नेता तथा पूर्व प्रधानमन्त्री शेरबहादुर देउवाले भने सहमति पनि नहुने र मतदानको प्रक्रियामा जान पनि उचित नहुने भएकाले अन्तरिम संविधानलाई नै संसोधन गरेर संविधान जारी गर्न प्रस्ताव गरेका छन् ।
देउवाले नेपालको अन्तरिम संविधान २०६३ लाई संसोधन गरेर ‘अन्तरिम’ शब्द हटाउँदै त्यही संविधान जारी गर्नुपर्ने प्रस्ताव गरेका छन् । बैठकमा सहभागी अन्य नेताहरुले भने मतदानको प्रक्रियाबाट नयाँ संविधान जारी गर्नुपर्नेमा जोड दिएको बताइएको छ ।