काठमाडौं । इङ्ल्यान्डले युईएफए नेसन्स लिग फुटबलमा क्रोएसियालाई पराजित गर्दै सेमिफाइनलमा प्रवेश गरेकाे छ ।
आफ्नै घरेलु मैदानमा भएको खेलमा इङ्ल्यान्डले क्रोएसियालाई २-१ गोलअन्तरले पराजित गरेकाे हाे । इङ्ल्यान्डका लागि जेसी लिंगार्ड र कप्तान ह्यारी केनले गोल गरेका थिए । क्रोएसियाका लागि आन्द्रेज क्रमारिचले गोल गरेका थिए ।
पहिलो हाफ भने दुबै टिम गाेलरहित बराबरीमा थिए । दोस्रो हाफमा इङ्ल्यान्डले दुई गोल गरेकाे थियाे । क्रोएसियाका लागि ५७ औं मिनेटमा क्रमारिचले गोल गरी अग्रता दिलाएका थिए । खेलको ७८ औं मिनेटमा लिंगार्डले गोल गरी बराबरी गरेका थिए । ८५ औं मिनेटमा कप्तान ह्यारी केनले गोल गर्दै इङ्ल्यान्डलाई २-१ गोलको जित दिलाए ।
जितपछि इङ्ल्यान्डले लिग ‘ए’ समूह ४ बाट ४ खेलमा ७ अंक बनाउँदै सेमीफाइनलमा स्थान बनाएको छ ।
स्वीट्जरल्यान्डले यूईएफए नेसन्स लिग फुटबलमा बेल्जयमलाई पराजित गर्दै सेमिफाइनलमा प्रवेश गरेको छ ।
स्वीट्जरल्यान्डकाे दनादन ५ गाेल
आफ्नै मैदानमा भएको खेलमा स्वीट्जरल्यान्डले बेल्जियमलाई ५–२ गोलअन्तरले पराजित गरेको छ । सुरुवाती समयमा नै दोब्बर गोलको अग्रता बेल्जियमले जोगाउन सकेन । खेलको दोस्रो मिनेटमा नै हजार्डले गोल गर्दै बेल्जियमलाई अग्रता दिलाएका थिए ।
फेरी खेलको १७ औं मिनेटमा उनले अर्को गोल गर्दै बेल्जियमलाई दोब्बर अग्रता दिलाएका थिए ।
स्टार खेलाडीले भरिएकाे बेल्जियमले शानदार सुरुवात गरेपनि पछि खराब प्रदर्शन गरेकाे थियाे । खेलको २६औं मिनेटमा नै पेनाल्टीबाट बेल्जियमले गोल खान पुगेको थियो । २६ औ मिनेटमा रिकार्डो रोड्रिग्वेजको गोलबाट स्वीट्जरल्यान्डले २–१ गोलको स्थितिमा पुगेको थियो । स्वीजरल्यान्डको जितमा हरिसले ह्याट्रिक गोल गरे ।
३१औं, ४४ औं र ८४औं मिनेटमा गोल गर्दै उनले ह्याट्रिक गोल पूरा गरेका थिए । त्यस्तै, खेलको ६२औं मिनेटमा निसो एलभिडीले गरेका थिए ।
