काठमाडाैं, २३ मंसिर । प्रतिनिधिसभाको संसदीय सुनुवाई समितिकाे बैठकले विभिन्न चार मुलुकका लागि प्रस्तावित राजदूतहरुको नाम अाइतबार अनुमोदन गरेको छ ।
सिंहदरबारमा बसेकाे बैठकले भारतका लागि निलाम्बर आचार्य, मलेसियाका लागि उदयराज पाण्डे, इजरायलका लागि डा. अञ्जान शाक्य र संयुक्त अरब इमिरेट्स् यूएईका लागि कृष्णप्रसाद ढकालको नाम सर्वसम्मतिले अनुमोदन गरेको हो ।
समितिका सदस्यहरुले प्रस्तावित चारै जना राजदूतसँग उनीहरुको भावी कार्ययोजना, कार्यक्षमता, योग्यता र नेपालमा लगानीको सम्भावना लगायतका विषयमा प्रश्न गरेका थिए । प्रस्तावित राजदूत विरुद्ध व्यक्तिगत रुपमा कुनै उजुरी नआएको र समितिमा उठेका प्रश्नहरुमा उनीहरुले चित्तबुज्दो जवाफ दिएकाले सर्वसम्मतिले नाम अनुमोदान गरेको समिति सदस्य योगेश भट्टराईले जानकारी दिनुभयो ।
राजदूत नियुक्ती प्रकृया समावेशी हुन नसकेको भन्दै संसदीय समितिले सरकारको ध्यानाकर्षण समेत गराएको छ । अहिले नियुक्त भएका राजदूतहरु समावेशी ढंगले चयन हुन नसकेको भन्दै आगामी दिनमा राजदूत नियुक्त गर्दा समावेशी अवधारणा अपनाउन सरकारको ध्यानाकर्षण गराईएको सदस्य भट्टराईले बताउनुभयो ।
प्रस्तावित राजदूतहरुको बारेमा संसदीय समितिले अनुमोदन गरेपछि अब सरकारले उनीहरुको एग्रिमो सम्बन्धित देशमा पठाउने छ । एग्रिमो स्वीकृति भएर आएपछि राष्ट्रपतिले नियुक्त गर्ने संवैधानिक व्यवस्था छ ।
मन्त्रिपरिषद्को कात्तिक २५ गतेको बैठकले राजदूत नियुक्ति सम्बन्धी निर्णय गरेकाे थियाे । उहाँहरुमध्ये आचार्यसँग पूर्वमन्त्री एवं पूर्वराजदूत भएको अनुभव छ भने पाण्डेले यसअघि पनि राजदूतको जिम्मेवारी सम्हालीसक्नुभएको छ ।
परराष्ट्र मन्त्रालयका सहसचिव ढकालले यसअघि नयाँ दिल्लीस्थित नेपाली राजदूतावासमा कार्यवाहक राजदूतको जिम्मेवारी डेढ वर्ष सम्हाल्नुभएकाे थियाे ।
परराष्ट्र मामिला अध्ययन प्रतिष्ठानको उपकार्यकारी निर्देशकलगायतका विभिन्न जिम्मेवारीमा रहेर काम गर्नुभएकी डा शाक्यले मुलुकको राष्ट्रिय हितलाई सर्वाेपरी राखेर सरकारको विकास र समृद्धिको लक्ष्यलाई आधार बनाएर आफूले कार्यसम्पादन गर्ने बैठकसमक्ष प्रतिबद्धता जनाउनुभयो ।
