काठमाडौं । प्रधानमन्त्री केपी शर्मा ओली वाइडबडी विमान खरिद अनियमितता प्रकरणमा गहिराइसम्म पुगेर छानबिन गर्ने निष्कर्षमा पुगेका छन् ।
प्रधानमन्त्री ओलीले भनेझै निष्पक्ष छानबिन भए नेकपाकै अध्यक्ष पुष्पकमल दाहाल ‘प्रचण्ड’ पनि छानबिनको दायरामा आउने देखिएको छ । बहालवाला पर्यटन तथा नागरिक उड्डयनमन्त्री रवीन्द्र अधिकारीसमेत मुछिएको प्रकरणमा सरकारले जरैदेखि छानबिन गर्ने निष्कर्षमा प्रधानमन्त्री पुगेका हुन् ।
‘मन्त्रिपरिषद्का सदस्यलाई कारबाहीका लागि सिफारिस गरेपछि प्रधानमन्त्रीज्यूले चासो नलिने त प्रश्नै रहेन । त्यसैले सरकारले अब वाइडबडी प्रकरणको रौं–चिरा केलाएर छानबिन गर्छ । कहाँबाट सुरु भयो जिन(वंशानुगत) पत्ता लगाएर सम्पूर्ण कुरा बाहिर आउने गरी छानबिन हुन्छ,’ प्रधानमन्त्री ओलीलाई उद्धृत गर्दै एक सल्लाहकारले भने, ‘लहरो तान्दा पहरो गर्जिए गर्जियोस्, सरकार त्यसरी छानबिन गरेर जो–जो दोषी ठहरिन्छन्, उनीहरूलाई कडा कारबाही गर्ने पक्षमा उहाँ हुनुहुन्छ ।’
संसद्मा सरकारको धारणा राख्दै
प्रधानमन्त्री ओलीले वाइडबडी अनियमितता प्रकरणमा केन्द्रित रहेर बिहीबार संघीय संसद्को बैठकलाई सम्बोधनको तयारी गरेका छन् । ‘बिहीबार प्रधानमन्त्रीज्यूले यस विषयमा सरकारको धारणा राख्नुहुन्छ,’ प्रेस सल्लाहकार कुन्दन अर्यालले भने, ‘सम्पूर्ण रूपमा छानबिन गरेर दोषीमाथि कारबाही होस् भन्ने पक्षमा सरकार छ ।’
बुधबार सरकारीनिवास बालुवाटारमै बसेर प्रधानमन्त्रीले सम्बोधनको गृहकार्य गर्नुका साथै सुझाबसमेत संकलन गरेका छन् । वाइडबडी अनियमितता प्रकरणमा अहिलेसम्म उठेका सबै प्रश्नको जवाफ दिने प्रधानमन्त्रीको तयारी छ ।
विवादमा मुछिएका मन्त्री रविन्द्र अधिकारीले राजीनामा दिन्छन् कि प्रधानमन्त्रीले बर्खास्त गर्छन् भन्ने जिज्ञासा सर्वत्र छाएको छ ।
पार्टीले भ्रष्टाचारविरुद्ध कदम चाल्छ : श्रेष्ठ
पार्टीले लेखा समितिअन्तर्गतको उपसमितिका तर्फबाट प्रतिवेदन आइसकेपछि कुनै औपचारिक छलफल गरिसकेको छैन । अब लेखा समितिले बैठक बसेर कुनै निर्देशन पनि दिन्छ होला । के निर्णय गर्छ, त्यो पनि हेर्न बाँकी नै छ ।
तैपनि पार्टीको तर्फबाट भन्न सकिने कुरा के हो भने संसद् वा कहीँकतैबाट भ्रष्टाचार पुष्टि हुन्छ भने पार्टी र सरकारले गम्भीरतापूर्वक लिनेछ । भ्रष्टाचारविरुद्ध जे कदम चाल्नुपर्ने हो, त्यो चाल्ने छ । आजको नयाँ पत्रिका दैनिकमा समाचार छ ।
