काठमाडौं । मोबाइल एप्लिकेसन (एप्स)मार्फत उपत्यकामा भाडामा सञ्चालित मोटरसाइकल र स्कुटरलाई निर्वाध चल्न दिने प्रधानमन्त्री केपी ओलीको निर्देशनलाई यातायात व्यवस्था विभागले कार्यान्वयन गर्न अटेर गरेको छ । प्रधानमन्त्री ओलीले बुधबार सिंहदरबारस्थित योजना आयोगको बैठकमा भौतिक पूर्वाधार तथा यातायातमन्त्री रधुवीर महासेठलाई भाडामा चल्ने मोटरसाइकल र स्कुटरलाई नरोक्न निर्देशन दिएका थिए । तर, विभागले प्रधानमन्त्रीको निर्देशनअनुसार मन्त्रालयबाट कुनै लिखित निर्देशन प्राप्त नहुँदा भाडामा सञ्चालित दुईपांग्रे सवारीसाधनलाई निर्वाध चल्न दिन भनी कुनै निर्णय गरेको छैन ।

‘निजी सवारीसाधन भाडामा चलाउनु गैरकानुनी’
सवारी यातायात व्यवस्था ऐन, २०४९ को दफा ८ को उपदफा १ बमोजिम दर्ता भएको निजी सवारीसाधन भाडामा चलाउन नपाउने व्यवस्था छ । त्यसो हुँदा उक्त ऐन संशोधन नभएसम्म प्रधानमन्त्रीकै निर्देशन भए पनि निजी प्रयोजनमा दर्ता भएका सवारीसाधन भाडामा चलाउनु गैरकानुनी हुने यातायात व्यवस्था विभागको भनाइ छ । विभागका प्रवक्ता उपाध्यायले कानुन संशोधन नभएसम्म निजी प्रयोजनमा दर्ता भएका सवारीसाधनलाई भाडामा चलाउन दिनु गैरकानुनी रहेको बताए ।

यातायात विभाग भन्छ– कुनै निर्णय भएको छैन
यातायात व्यवस्था विभागले माथिल्लो निकायबाट कुनै लिखित निर्देशन प्राप्त नहुँदा टुटल र पठाओ एप्स प्रयोग गरी भाडामा सञ्चालित मोटरसाइकल र स्कुटर निर्वाध चल्न दिने कुनै निर्णय नभएको जनाएको छ । विभागका अनुसार उजुरी परेमा प्रहरीले कुनै पनि वेला त्यस्ता मोटरसाइकल फेरि पनि नियन्त्रणमा पर्ने स्पष्ट पारेको छ । ‘माथिबाट कुनै लिखित निर्देशन आएको छैन । विभागले पनि त्यस्ता मोटरसाइकल र स्कुटर चल्न दिने सम्बन्धमा नयाँ निर्णय गरेको छैन । न त कुनै निर्देशन नै दिएको छ । त्यसैले उजुरीमा परेमा ती सवारीसाधन नियन्त्रणमा पर्न सक्छन्,’ उनले भने ।

महानगरीय प्रहरी ट्राफिक प्रहरी महाशाखाले पनि टुटल र पठाओ एप्समार्फत चलेका भाडाका मोटरसाइकललाई निर्वाध चल्न दिने आशयको कुनै लिखित निर्देशन प्राप्त नभएको जनाएको छ । ‘प्रहरी कानुन कार्यान्वयन गर्ने निकाय हो ।

१५ हजार स्कुटर र मोटरसाइकल सञ्चालनमा
उपत्यकाभित्र ‘टुटल’ र ‘पठाओ’ एप्स प्रयोग गरी करिब १५ हजार मोटरसाइकल र स्कुटर भाडामा सञ्चालित छन्  । टुटलले यो सेवा दुई वर्षअघिदेखि सञ्चालन गरिरहेको छ । यही सेवा सञ्चालनका लागि मात्रै टुटलले करोड रुपैयाँभन्दा धेरै लगानी गरिसकेको छ । त्यस्तै, ‘पठाओ’ एप्सको ‘सब्सक्राइबर’ १० हजार छन । यो एप्स प्रयोग गरी ६ हजार मोटरसाइकल र स्कुटर भाडामा चलेका छन् । ‘पठाओ’ एप्सबाट भने यस्ता मोटरसाइकल सञ्चालन भएको ६ महिना मात्रै भएको छ । नयाँ पत्रिका दैनिकमा खबर छ ।