काठमाडौंः चीनको दक्षिणपूर्वको छिमेकी मुलुक लाओस भूपरिवेष्टित मुलुक हो, यसलाई भियतनाम, कम्बोडिया, थाइल्यान्ड, म्यान्मार र चीनले घरेका छन् ।
दक्षिणपूर्वी एसियाली मुलुक लाओस र चीनको युनान प्रान्तको राजधानी शहर कुनमिङबीच झण्डै एक हजार किलोमिटर लामो रेल्वे लाइन निर्माण भएको छ । तिब्र गतिको रेल दौडाउन मिल्ने यो रेल्वे लाइन यही डिसेम्बर महिनाको शुरुमै उदघाटन हुँदैछ ।
यो रेल्वे लाइनले लाओसको राजधानी भिएन्टिनलाई जोड्ने छ । यो आयोजना चीनले अघि सारेको बेल्ट एन्ड रोड इनिसिएटिभ (बिआरआई) कै एक भाग रहेको चिनियाँ संचार माध्यम सिजिटिएन टेलिभिजनले जनाएको छ ।
यो रेलसेवाको प्रारम्भसँगै लाओस अब भूपरिवेष्टित राष्ट्रबाट जमिनबाट एकअर्का मुलुकसँग जोडिएको मुलुक (ल्यान्डलिन्क्ड मुलुक) का रुपमा रुपान्तरण हुनेछ ।
लाओस सरकारले आफ्नो मुलुकलाई समृद्ध बनाउन र देशको अर्थतन्त्रलाई गतिशिल बनाउन यस रेल्वे लाइनको निर्माणले महत्वपूर्ण भूमिका निर्वाह गर्ने विश्वास लिएको छ ।
दक्षिणपूर्वी एसियाली मुलुक लाओसलाई मेकोङ नदीले काटेको छ र यो मुलुक अग्लाअग्ला पहाडले बनेको छ । यो मुलुकमा फ्रान्सेली उपनिवेश लामो समय रहेको थियो, र यहाँ बौद्ध धर्मशालाहरु छन् ।
हाल करिब ७४ लाख जनसंख्या रहेको यो मुलुक आर्थिक रुपमा पिछडिएको छ । युद्ध, गृहयुद्ध समेतका अनेक क्रान्ति र पीडाबाट गुज्रेको लाओसले २०औं शताब्दीको अन्त्यदेखि अपनाएको आर्थिक उदारीकरणपछि विदेशी लगानी भित्रिएको छ । लाओसमा सर्वाधिक ठूलो लगानीकर्ता मुलुक चीन नै रहेको छ ।
