काठमाडौँ । पर्यटनमन्त्री रवीन्द्र अधिकारीसहित ७ जनाको मृत्यु हुने गरी ताप्लेजुङमा भएको हेलिकोप्टर दुर्घटना खराब मौसमका कारण दुर्घटना परेको हुनसक्ने प्रारम्भिक अनुसन्धानले देखाएको छ ।
सिंहदरबारस्थित गृहमन्त्रालयमा आकस्मिक पत्रकार सम्मेलन गर्दै गृहप्रवक्ता रामकृष्ण सुवेदीले खराब मौसमका कारण दुर्घटना भएको बताएका हुन् ।
उनका अनुसार तेह्रथुमको चुहानडाँडामा आयोजित एक कार्यक्रममा सहभागी भएर मन्त्री अधिकारीसहितको टोली पाथिभरा दर्शनका लागि गएको थियो । हाल मन्त्री अधिकारीसहित हेलिकोप्टरमा सवारी ७ जनाकै शव भेटिएको उनले बताए ।
उनका अनुसार मन्त्री अधिकारी र उनका पीएसओ सेनाका जमदार अर्जुन घिमिरेको शव पहिचान भएको छ । अन्यको भने शव पहिचान भएको छैन ।
उनका अनुसार हेलिकप्टर क्याप्टेन प्रभाकर केसीले उडाएका थिए । यस्तै,विमानमा पर्यटनमन्त्री रवीन्द्र अधिकारीसहित यती एयरलाइन्सका अध्यक्ष आङ छिरिङ शेर्पा, स्वकीय सचिव युवराज दाहाल, विरेन्द्र प्रसाद श्रेष्ठ, अर्जुन घिमिरे र नागरीक उड्यन प्राधिकरणका निर्देशक घुर्व भोछिभोया सवार रहेका थिए।
सातै जनाको मृत भेटिएको र शव संकलनको काम सकिएको उनले जानकारी दिए ।
यता, मन्त्री रवीन्द्र अधिकारीका बुबाआमालाई काठमाडौँ ल्याइएको छ । मन्त्री अधिकारीको मृत्यु भएको पुष्टि भएसँगै आमा लक्ष्मी र बुबा इन्द्र अधिकारीलाई केहीसमय अघि काठमाडौँ ल्याइएको हो ।
त्रिभुवन विमानस्थलका प्रवक्ता प्रतापबाबु तिवारीपनि भारी हिमपातका कारण हेलिकोप्टर दुर्घटना भएको प्रारम्भिक अनुमान रहेको बताएका छन् । उनका अनुसार हेलिकोप्टर ताप्लेजुङको पाथीभरा मन्दिर दर्शनपछि उडेको एक मिनेटमै दुर्घटनामा परेको भिडियो ट्र्याक रेकर्डबाट देखिएको जानकारी दिए ।
