पोखरा । ताप्लेजुङमा बुधवार भएको हेलिकोप्टर दुर्घटनामा ज्यान गुमाएका पर्यटन तथा नागरिक उड्डयनमन्त्री रविन्द्र अधिकारीको अन्तिम श्रद्धाञ्जलीका लागि पोखरामा तयारी पुरा भएको छ । अधिकारीको पार्थिव शरीर पोखराको नयाँ बजार स्थित प्रदर्शनी केन्द्रमा श्रद्धाञ्जलीका लागि राखिएको छ । ।
अधिकारीको पार्थिव शरीरलाई रामघाट स्थित सेती नदी किनारमा अन्त्यष्टि गर्नुअघि उपप्रधान तथा रक्षामन्त्री ईश्वर पोखरेलले राष्ट्रिय झण्डा ओढाउनेछन् भने नेकपाले नेता वामदेव गौतम र नारायणकाजी श्रेष्ठले भने पार्टीको झण्डा ओढाउनेछन् ।
देशकै निम्ति अझै धेरै योगदान गर्न बाँकी रहेका बेलामा अधिकारकिो निधनले पोखरा र सिंगो देशलाई समेत अपुरणीय क्षति पुगेको गण्डकी प्रदेशका मुख्यमन्त्री पृथ्वीसुब्बा गुरुङले बताएका छन्।
मन्त्री अधिकारीलाई श्रद्धाञ्जलीका लागि उपप्रधानमन्त्री ईश्वर पोखरेल, नेकपाका नेता नारायणकाजी श्रेष्ठ, बामदेव गौतम, योगेश भट्टराई, राजन भट्टराई, घनश्याम भुसाल, मन्त्री पद्मा अर्याल, कांग्रेस नेता चन्द्र भण्डारी पोखरा आएका छन् । त्यस्तै गण्डकी प्रदेशका मुख्यमन्त्री पृथ्वी सुब्बा गुरुङ र प्रदेश सरकारका मन्त्रीहरु पनि श्रद्धाञ्जली दिन आएका छन् ।
