काठमाडौँ । भारतीय वायुसेनाको मिग २१ लडाकु विमान दुर्घटनाग्रस्त भएको छ । भारतीय मिडियाहरुको अनुसार उक्त विमान आकाशमा चरासँग ठोकिएपछि दुर्घटनाग्रस्त भएको हो ।
सञ्चारमाध्यमहरुका अनुसार पाकिस्तानसँग सीमा जोडिएको राजस्थान राज्यको बिकानेर शहरनजिक विमान दुर्घटनाग्रस्त भएको छ ।
दुर्घटनाग्रस्त लडाकु विमानका पाइलट भने सुरक्षित रहेका छन् । उक्त विमान नियमित हवाई गस्ती गर्ने क्रममा चरासँग ठोक्किँदा दुर्घटनामा परेको बताइएको छ ।
पछिल्ला दुई सातायता भारत र पाकिस्तानबीच तनाव बढ्दै जाँदा दुबै मुलुकले हवाई गस्तीलाई तिब्रता दिएको बताइएको छ ।
त्यसअघि गत २७ फेब्रुअरीका दिन पाकिस्तानले भारतीय वायुसेनाको मिग २१ विमान खसालेको थियो ।
पाकिस्तानी प्रधानमन्त्री इमरान खानले खसालिएको विमानका पाइलटलाई रिहा गरेपछि भारत र पाकिस्तानबीचको तनाव केही कम हुँदै आएको छ ।
