बुटवल । गृहमन्त्री रामबहादुर थापा ‘बादल’ले मुलुकको शान्ति सुरक्षामा खलल पुर्याउने जो कोहीलाई कारबाही गरेरै छाड्ने बताएका छन्।शान्ति सुरक्षा कायम गर्नु सरकारको दायित्व भएको भन्दै त्यसका लागि जुनसुकै कदम चाल्न पनि सरकार तयार रहेको बताएका हुन् ।
प्रदेश ५ स्तरीय सुरक्षा गोष्ठीमा सहभागी हुन भैरहवा आएका गृहमन्त्री थापाले सञ्चारकर्मीहरुसँग कुरा गर्दै भने, “शान्ति सुरक्षा कायम गर्नु सरकारको दायित्व हो सरकारले देशमा अमनचैन कायम गर्नको निम्ति जुनसुकै कदम चाल्न सक्छ ।”
नेत्रविक्रम चन्द ‘विप्लव’ नेपाल कम्युनिस्ट पार्टीतर्फ संकेत गर्दे उनले संविधान र व्यवस्थाको विरोध गर्नेहरुलाई नियन्त्रण गर्न सरकार तयार रहेको र उनीहरुलाई निस्तेज बनाउन सरकारले कदम चालिसकेको बताए।
‘पछिल्लो समय विप्लव नेतृत्वको नेकपाले बम विस्फोट गराउने, जनप्रतिनिधिलाई अपहरण गर्ने, चन्दा असुलीका लागि व्यक्तिलाई धम्क्याउने गरेको छ’ थापाले भने, ‘सरकार अब लाचार भएर बसन सक्दैन् अब कडा रुपमा प्रस्तुत हुन्छ ।’
विखण्डनको नारा लगाउने सीके राउतलाई शान्तिपूर्ण मूलधारमा ल्याएको उनले दावी गरे।
थापाले मुलुक विखण्डन गर्ने विषयमा जनमत संग्रहको व्यवस्था संविधानमै नभएको बताए ।
विखण्डनको नारा लगाइरहेका सीके राउतका कार्यकर्तासम्म सम्झौताको सन्देश पुगिनसकेको कारण समस्या भएको र यसको पनि छिट्टै हल हुने उनको दावी थियो।
सुरक्षा गोष्ठीमा प्रदेश ५ का आन्तरिक मामिला तथा कानुनमन्त्री, प्रदेश ५ का प्रमुख सचिव, गृह सचिव, सुरक्षा निकायका प्रमुख, प्रदेश ५ का १२ वटै जिल्लाका प्रमुख जिल्ला अधिकारी, सुरक्षा निकायका प्रमुख लगायतको सहभागिता छ ।
