दाङ । बर्दीसहित दाङ आइपुगेका दुई भारतीय प्रहरीलाई पक्राउ गरिएको छ । पक्राउ पर्नेमा मुजफ्फरपुर थाना तिलाहर उत्तरप्रदेशमा कार्यरत थानेदार भिके मौर्य र हेड कन्स्टेबल महोम्मद अनिस रहेका छन् ।
बाँकेको रुपैडिहा नाका हुँदै बिहिबार नेपाल आएका उनिहरुलाई अनुसन्धानका लागि पक्राउ गरिएको हो । स्थानियका अनुसार दुई बर्दीधारीसहित ७ जना भारतीय नम्बर प्लेटको गाडीमा दाङ आएका थिए । अनुसन्धानका क्रममा ५ जना भने गैरप्रहरी रहेको जिल्ला प्रहरी प्रमुख एसपी बेलबाहदुर पाण्डेले बताए ।
‘बाँकेको सीमा क्षेत्रबाट दाङ पुग्न करिब १ सय ५० किलोमिटरको यात्रा गर्नुपर्छ । थुप्रै ठाउँमा गाडी चेकजाँच पनि हुन्छ । “एसपी पाण्डेले” भने, दाङ र बाँकेको सीमा क्षेत्रमा पर्ने बाँके राष्ट्रिय निकुञ्जमा नेपाली सेनाले गाडीको दर्तासँगै खानतलासी गर्छ । यस्तो अवस्थामा बर्दीमै रहेका भारतीय प्रहरी दाङ आइपुग्नु आश्चर्यको बिषय हो ।’
एसपी पाण्डेका अनुसार दाङको ईट्टाभट्टामा कार्यरत भारतीय कामदारका बिषयमा मानव बेचबिखन मुद्दा भएकाले अनुसन्धान गर्न आएको बताए । आपराधिक घटनामा अर्को देश पुगेर अनुसन्धान गर्दा दुई देशबीच समन्वयन हुनुपर्ने भएपनि उनिहरुले कुनै समन्वयन नगरेको कारण पक्राउ गरिएको एसपी पाण्डेले बताए ।
उनिहरुलाई एक रात नियन्त्रणमा लिएर भारत फिर्ता गरेको एसपी पाण्डेले बताए ।
