काठमाडौँ । नेपाली कांग्रेसका महामन्त्री डा. शशांक कोइरालाले धर्मबारे जनमत संग्रह गर्न सबैले सरकारमाथि दबाव दिनकोलागि आह्वान गरेका छन् । उनले हिन्दु धर्मले नै देशको पहिचान बचाएको भन्दै देशलाई हिन्दु राज्यको घोषण गर्न सरकारलाई आग्रह गरे ।
टोखास्थित आफ्नै निवासमा बुधबार होलीको शुभकामना आदानप्रदान कार्यक्रममा कोइरालाले जनमत संग्रहको आवश्यकता रहेको बताएका हुन् । संविधानका धारामा धर्मिक स्वतन्त्रता वा धर्मबारे जनमत संग्रह गर्न पाउने भनेर उल्लेख भएको भन्दै उनले जनमत संग्रह गराउनुपर्ने बताए ।
उनले भने, ‘कांग्रेसको चार तारे झण्डाको एउटा तार धर्म स्वतन्त्रताका लागि हो । धर्म न स्वतन्त्र हुन्छ न सापेक्ष हुन्छ ।’
आफूलाई तीन पटक जिताएर पठाएका धेरै जनता हिन्दु धर्मावलम्बी रहेको भन्दै उनले भने धार्मिक स्वतन्त्रता नभन्ने हो भने जनमत संग्रह गर्नुपर्ने बताए । उनले भने, ‘जनमत गराउनुपर्यो, जसमा पार्टीले हस्तक्षेप गर्नु हुँदैन ।’
