धरान । एक नम्बर प्रदेशको राजधानी धरानलाई तोक्नुपर्ने माग गर्दै धरानबासीहरुले सिट्टी जुलुस निकालेका छन् ।
धरान उपमहानगरपालिकाको अगुवाइमा धरानलाई राजधानी घोषणा गर्न माग गर्दै धरानवासीले प्रदेशसभा अगाडि प्रदर्शन गरेका हुन् । उनीहरूले सिट्ठी फुकेर प्रदर्शन गरिरहेका छन् ।
एक नम्बर प्रदेशको राजधानी र नामांकन टुङ्गो लगाउन मुख्यमन्त्री शेरधन राईको अध्यक्षतामा बसेको बैठकमा कांग्रेसका संसदीय दलका नेता राजीव कोइराल, संघीय समाजवादी फोरम नेपालका संसदीय दलका नेता जयराम यादवलगायतको उपस्थित रहेको छ ।
स्थायी राजधानी तोक्ने तयारी गरेको प्रदेश १ सरकारले केही दिनअघि मात्रै साविकको पूर्वाञ्चलको राजधानी धनकुटालाई सम्पर्क राजधानी बनाउने निर्णय गरेको थियो ।
राजधानी र नाम बारे एक मत हुन नसकेपछि विभिन्न जिल्लाबाट प्रतिनिधित्व गर्ने सांसदहरुसंग छुट्टाछुट्टै छलफल गरिएको थियो ।