काठमाडौँ । दिल्लीबाट खेलीरहेका नेपाली लेग स्पिनर सन्दीप लामिछानेको आइपिएल यात्रा सकिएको छ ।
शुक्रबार राती चेन्नई सुपरकिंग्ससँग ६ विकेटले पराजित भएसँगै दिल्लीको यस सिजनको आइपिएल यात्राबाट बाहिरिएपछि सन्दीपको आइपिएल यात्रापनि सकिएको छ ।
दोस्रो सिजन आइपिएलमा दिल्ली क्यापिटल्सबाट खेलेका सन्दीपको यस सिजन मिश्रित रहेको छ । दिल्लीले खेलेका कुल १६ खेलमा सन्दीपले केवल ६ खेलमा खेल्ने मौका पाए ।
सन्दीपले खेलेका ६ खेलमा कुल ८ विकेट लिएका छन् । सन्दीपले रोयल च्यालेन्जर्स बैंगलोरविरुद्धको खेलमा बाहेक अन्य पाँचै खेलमा विकेट लिएका थिए । यस सिजनमा खेलेका खेलमा किंग्स इलेभेन पंजावविरुद्ध खेल्दै सर्वाधिक ३ विकेट लिएका थिए ।
दिल्लीको विदेशी खेलाडीको कोटाबाट नियमित रुपमा प्लेइङ एघारमा पर्न नसक्दा सन्दीपको यस सिजनको प्रदर्शन प्रभावित भएको देखिएको छ ।
समग्रमा हेर्दा सन्दीपले यस सिजनमा कुल ६ खेलमा २३ ओभर बलिङ गर्दै २१० रन दिएर ८ विकेट लिएका छन् । सन्दीपको औसत विकेट २६.२५ रन छ भने इकोनोमी ९।१३ रन प्रति ओभर रहेको छ ।
अघिल्लो सिजनमा केबल ३ खेल खेलेका सन्दीपले ६.८३ को इकोनोमी रेटले ५ विकेट लिएका थिए ।
