मकवानपुर । नेपाल प्रहरीले अनुमतिविना हातहतियारसहित हेटौंडा–४ मा रहेको भुवनेश्वर (पशुपति) मन्दिर दर्शन गर्न आएका भारतीय प्रहरीलाई फिर्ता पठाएको छ। भारतीय दुई असई र दुई प्रहरी जवानलाई सामान्य सोधपुछपछि भारत फिर्ता गरेको हो ।
शनिबार बिहानै पोशाकमा वीरगञ्ज नाकादेखि करिब एक दर्जन प्रहरी चौकी पार गर्दै उनीहरु हेटौंडा आएका हुन् । स्थानीयबासीले हातहतियारसहित हेटौंडा आइपुगेका भारतीय प्रहरीबारे प्रहरीलाई खबर गरेपछि मकवानपुर प्रहरीले नियन्त्रणमा लिएको थियो।
मकवानपुर प्रहरीले भारतीय प्रहरीलाई शनिबार विहान करिब ७ बजे पशुपति मन्दिरमा दर्शन गर्ने क्रममा नियन्त्रणमा लिएको थियो । पशुपति मन्दिर रक्सौलबाट ५८ किलोमिटर पर्छ ।
उनीहरूलाई सामान्य सोधपुछ गरी फिर्ता पठाइएको प्रहरीले जनाएको छ । उनीहरुले मन्दिर दर्शनपश्चात् खाजाखाने योजना बनाएका थिए । उनीहरुले गेष्टहाउसमा कोठा खोजेको बताइएको छ ।
