मोरङ । संघीय सरकारलाई चुनौती दिँदै विराटनगर महानगरपालिकाले कोइराला निवासमा नगर रक्षक खटाएको छ ।
२०५४ सालमा घर पछाडिबाट माओवादीले बम हानेपछि कोइराला निवासमा सुरक्षार्थ सुरक्षाकर्मी खटाइएको थियो । निवास परिसरमै सुरक्षाकर्मी बस्न क्वाटर तथा अलग्गै भान्साको समेत व्यवस्था गरिएको थियो । यो घटनापछि सशस्त्र प्रहरीका असइको नेतृत्वमा एक दर्जन सुरक्षाकर्मी निवासको सुरक्षामा थिए ।
सरकारले विशिष्ट व्यक्तिको निवासमा खटिएका सुरक्षाकर्मी फिर्ता बोलाउने निर्णय गरेपछि कोइराला निवासको सुरक्षार्थ खटिएका सुरक्षाकर्मी पनि हटेका थिए । सुरक्षाकर्मी हटेपछि प्रजातान्त्रिक आन्दोलनको केन्द्र मानिएको विराटनगरको ‘कोइराला निवास’ मा एकसय वर्षको अवधिमा गत बिहीबार पहिलो पटक ताला लागेको थियो ।
तर प्रहरी हटेपछि कांग्रेसले सरकारको आलोचना गरेपछि पुनः सशस्त्र प्रहरी बललाको ठाउँमा महानगरले नगर रक्षक खटाएको विराटनगर महानगरपालिकाका मेयर भीम पराजुलीले जानकारी दिए ।
मेयर पराजुलीले प्रजातन्त्रवादीहरुको घर भएकोले त्यसको सुरक्षा दिनु महानगरको पनि दायित्व रहेको बताए । उनले त्यसको सुरक्षाका लागि २ जना नगर रक्षक आजैदेखि खटाइएको पनि बताए ।
प्रजातान्त्रिक आन्दोलन र समाज सुधारको बिगुल यहीँबाट फुकिएको थियो । तीन जना प्रधानमन्त्री जन्माउने यो निवास अहिले आगन्तुकका लागि घुम्ने र बुझ्ने स्थानको रुपमा विकसितसमेत भएको छ ।
निवासमा पूर्वप्रधानमन्त्रीहरुका धेरै सरसामान जस्ताको तस्तै राखिएको छ । ऐतिहासिक सामान संग्रहित छन् ।
