काठमाडौं । १६६ यात्रु सवार युनाइटेड एयरलाइन्सको एक विमानको टायर अवतरणका क्रममा पंक्चर भएपछि अमेरिकाको न्युजर्सीमा रहेको व्यस्त न्युआर्क विमानस्थल शनिवार केही समयका लागि बन्द गरिएको छ ।
संघीय उड्डयन प्रशासनका अनुसार अवतरणका क्रममा टायर पंक्चर भएपछि विमान धावनमार्गबाट अलिकति चिप्लिएको थियो । प्रशासनको अनुसार यो घटनामा केही यात्रुलाई सामान्य चोटपटक लागेको थियो तर उनीहरूले स्वास्थ्य जाँच गराउन मानेनन्
युनाइटेड एयरलाइन्सको फ्लाइट ६२७ डेन्भरबाट आइपुगेर १ बजे अवतरण गरेको थियो । त्यसक्रममा यो धावनमार्गको देब्रेतर्फ चिप्लिएको थियो । विमानको प्रमुख ल्यान्डिङ गीयर घाँसे इलाकामा अड्किएको थियो ।
घटनापछि न्युर्आक विमानस्थल एक घन्टाका लागि बन्द गरिएको थियो । यात्रुहरू विमानबाट ओर्लिएपछि विमानलाई हटाइएको उड्डयन प्रशासनले बतायो । अनुसन्धानकर्मीहरूले यसको जाँचबुझ गरिरहेका छन् ।
