काठमाडौं । स्पेनिस ला लिगा च्याम्पियन बार्सिलोना प्रि–सिजन अन्तर्गत क्लब मैत्रीपूर्ण पहिलो खेलमा पराजित भएको छ ।
आज भएको खेलमा प्रिमियर लिग क्लब चेल्सीसँग बार्सिलोना २–१ गोलले पराजित भएको हो । चेल्सीको जितमा टम्ये अब्राहम र रोस बेर्कलीले समान एक एक गोल गरेका थिए । यता बार्सिलोनाको लागि एक मात्रै गोल इभान रकिटिचले गरे ।
आफ्ना मुख्य खेलाडी लुइस स्वारेज, फिलिपे कौन्टिन्हो र कप्तान लियोन मेस्सी बिनै मैदान उत्रिएको बार्सिलोनाले खेलको ३४ औं मिनेट मै गोल खाएको थियो । बार्सिलोनाका डिफेन्डर र गोलकिप्पर बिट हुँदा चेल्सीका टम्ये अब्राहमले बललाई गोल पोष्टको दिशा दिदै १–० को अग्रता दिलाएका थिए ।
पहिलो हाफसम्म बराबरी खेलेको बार्सिलोनाले दोस्रो हाफमा थप एक गोल खायो । खेलको ८१ औं मिनेटमा रोस बेर्कलीले चेल्सीको लागि गोल गर्दै अग्रता २–० बनाए । खेलको ९० औं मिनेटमा रकिटिकले गोल गर्ने मौका गुमाएका थिए । त्यसको एक मिनेट पछि नै उनले डि बक्स बाहिरबाट गोल गर्दै खेल २–१ को अन्तरमा झारे । त्यसपछि बाँकी समयमा कुनै गोल नहँुदा चेल्सीले २–१ गोलको जित हात पार्यो ।
प्रिसिजनअघि पाँच खेल खेल्न लागेको बार्सिलोनाले जुलाई २७ मा जापानकै भिसाल कोबे क्लबसँग खेल्नेछ ।
मेस्सी अगस्ट ४ तारिख आर्सनलविरुद्धको खेलमा उपस्थित हुने बार्सिलोनाले जनाएको छ । बार्सिलोनाले अगस्ट ७ र १० मा नापोलीसँग पनि दुई खेल खेल्दैछ । स्पेनिस ला लिगामा भने बार्सिलोनाले अगस्ट १६ तारिखमा एथ्लेटिक बिल्बाओसँग खेल्दै सन् २०१९–२०२० सिजनको सुरुवात गर्नेछ ।
