काठमाडौं । दक्षिण अमेरिकी फुटबल महासंघ (कन्मेबल) ले कोपा अमेरिका कपमा रेफ्रीको निर्णयको विरोध गरेको भन्दै अर्जेन्टिनाका कप्तान लियोनल मेस्सीलाई एक खेल प्रतिबन्ध र १५ सय अमेरिकी डलर जरिवानाको कारबाही गरिएको छ ।
मेसीले तेस्रो स्थानका लागि भएको चिलीविरुद्धको खेलमा रातो कार्ड समेत पाएकाले सो बापत एक खेलमा स्वतः प्रतिबन्ध समेत लागेको छ ।रातो कार्ड पाएर मैदान छोडेका मेसीले मेडल वितरण कार्यक्रम समेत बहिष्कार गरेका थिए ।
कोपाको सेमिफाइनलमा अर्जेन्टिना आयोजक ब्राजिलसँग पराजित भएको थियो । त्यस खेलमा रेफ्रीले ब्राजिलको समर्थन गरेको भन्दै मेसीले आक्रोश पोखेका थिए । मेसीले यस्तो अनियमितता हुने प्रतियोगितामा आफु सहभागी नहुने समेत बताएका थिए ।
मेसीको सो कमेन्टपछि कोपा फेडेरेसनले आपत्ति जनाउदै मेसीको भनाई अपमानजनक भएको बताएको थियो ।
यस कारबाहीसँगै मेस्सीले २०२० को मार्चमा अर्जेन्टिनाले खेल्ने फिफा विश्वकप २०२२ को छनोट चरणको पहिलो खेल गुमाउने छन् । कोपाबाट बाहिरिएपछि केही निराश बनेका मेस्सी अहिले परिवारसँग रमिरहेका छन् ।