काठमाडौं । विश्वकप छनोटको एसिया फाइनलको दोस्रो खेलमा नेपाल विजयी भएसंगै विश्वस्तरको छनोटमा पुग्ने सम्भावना आफ्नै नतिजामा भरपर्ने स्थिती देखिएको छ। नेपालले बाँकी दुवै खेल जिते विश्वस्तरको छनोटमा पुग्ने छ।
शुक्रबार कुवेतले कतारलाई हराएपछि नेपाललाई सहज बनेको हो। तीन खेलबाट पाँच अंक भएको सिंगापुर शीर्षस्थानमा छ। दोस्रो स्थानमा रहेको मलेसियाको तीन खेलबाट तीन अंक छ। दुई खेल खेलेको नेपालको दुई अंक छ। सिंगापुर र कतारले एक एक खेल तथा नेपालले दुई खेल खेल्न बाँकी छ।
नेपालले अब कुवेत र त्यसपछि सिंगापुरसँग खेल्ने छ। शनिबार हुने खेलमा कुवेतलाई हराए नेपाल दोस्रो स्थानमा उक्लने छ। त्यो अवस्थामा सिंगापुर र नेपालबीच हुने खेलको विजेता विश्वस्तरको छनोटमा पुग्ने छ।
पाँच टोली सहभागी एसियाली छनोटबाट एक टोलीमात्र विश्वस्तरको छनोटमा पुग्नेछन्। नेपाल पहिलो खेलमा कतारसँग पराजित भएको थियो भने दोस्रो खेलमा मलेसियालाई पराजित गर्न सफल भएको थियो।
